Eýropa Odaǵy AQSh-tyń Taiaý Shyǵystaǵy jaǵdaidy retteý josparyn qoldamady. Odaq ókilderi qajet bolsa Izraildiń Palestina jerin ári qarai jaýlap alý josparyna qarsy daý aitatynyn jetkizdi. Prezident Donald Tramp Taiaý Shyǵysqa bailanysty josparyn ótken aptada tanystyrǵan.
Eýropa Odaǵynyń syrtqy ister jáne qaýipsizdik saiasat jónindegi joǵarǵy ókili Jozep Borrel Eýroodaq "Izrail men táýelsiz, demokratiialyq, turaqty Palestina memleketiniń qatar ómir súrýine" qatysty ustanymyn ózgertpeidi dedi.
"Amerika daýysy" saitynyń jazýynsha, Tramp usynǵan josparda Palestina memleketin qurý máselesi qarastyrylsa da, palestinalyqtardyń qarapaiym talaptary eskerilmegen. Al Izraildiń sońǵy ondaǵan jyldar boiy talap etip kelgen usynystarynyń barlyǵyn oryndaýdy kózdeidi.
Jozep Borreldiń pikirinshe, Izraildiń Palestina aýmaǵyn anneksiialap alý talpynysy "jaýapsyz qalmaidy". Borrel beibitshilikti saqtaý úshin palestindik shekarany bekitip, Ierýsalimniń mártebesin anyqtap alý kerek dedi.
Palestina avtonomiiasynyń jetekshisi Mahmýd Abbas Tramptyń usynysyn "mán-maǵynasyz" jospar dep synaǵan. Parsy shyǵanaǵy elderi "ústirt" bastama dep atady.
Briýsselde odaq ókilderi Tramptyń 2017 jylǵy Ierýsalimdi Izrail astanasy dep taný týraly sheshimin synap, bul AQSh-tyń beibit protseste deldal bolý róline nuqsan keltiredi dedi.
