2 naýryzda Eýroodaq oppozitsiialyq saiasatker Aleksei Navalnyidyń qýdalanyp, túrmege qamalýyna bailanysty Reseidiń tórt laýazymdy tulǵasyna sanktsiia saldy. Osy kúni AQSh ta Reseige sanktsiia salatynyn málimdegen.
Eýroodaqtyń sanktsiiasy týraly aqparat uiymnyń resmi jýrnalynda jariialandy. Mátinde shekteýge ilikken sheneýnikterdiń aty-jóni atalmaǵan. Germaniiada shyǵatyn Bild jáne Focus jýrnaldarynyń málimeti boiynsha, tizimde tergeý komitetiniń basshysy Aleksandr Bastrykin, Resei gvardiiasynyń basshysy Viktor Zolotov, jazany oryndaý federaldyq qyzmetiniń direktory Aleksandr Kalashnikov jáne Reseidiń bas prokýrory Igor Krasnov bar.
Olardyń Eýroodaq elderine barýyna tyiym salynady, al odaq aýmaǵynda bar aktivi buǵattalady.
Telefonmen bolǵan baspasóz brifinginde AQSh prezidenti Djo Baiden ákimshiliginiń ókili Resei sheneýnikteri men kompaniialaryna sanktsiia salǵanyn málimdedi. Resmi Vashington Resei Navalnyiǵa ý berý oqiǵasyna Resei biliginiń qatysy bar dep sanaidy.
Brifingte Aq úi ókili Baiden ákimshiligi Máskeýmen qarym-qatynasyn qaita túzýge ia ýshyqtyrýǵa tyryspaitynyn, tek basqa áriptes eldermen birlesip "shekten asyp ketken jaǵdaida Reseidi jaýapqa tartatynyn" aitty. Bloomberg agenttiginiń habarlaýynsha, AQSh Reseige jańa sanktsiia salýdy josparlap otyr.
- Kremldi ótkir synap júrgen "Jemqorlyqpen kúres qorynyń" jetekshisi Aleksei Navalnyi "novichok" ýymen ýlanyp, Germaniiada uzaq emdelgen soń 17 qańtarda Máskeýge oralǵan jerinde qamaýǵa alynǵan. Keiin jazany óteý qyzmetiniń talabymen Máskeý soty onyń 2013 jylǵy shartty jazasyn túrme jazasyna almastyryp, oppozitsioner koloniiaǵa jiberildi.
- Jazany óteý qyzmeti Navalnyi shartty jaza erejelerin buzdy dep sanaidy, oppozitsiialyq saiasatker muny joqqa shyǵarady. Eýropadaǵy adam quqyqtary soty barlyq deńgeidegi sottar isti qaraǵansha, Navalnyidy bosatýdy talap etken.
