2 ناۋرىزدا ەۋرووداق وپپوزيتسييالىق ساياساتكەر الەكسەي ناۆالنىيدىڭ قۋدالانىپ, تٷرمەگە قامالۋىنا بايلانىستى رەسەيدٸڭ تٶرت لاۋازىمدى تۇلعاسىنا سانكتسييا سالدى. وسى كٷنٸ اقش تا رەسەيگە سانكتسييا سالاتىنىن مەلٸمدەگەن.
ەۋرووداقتىڭ سانكتسيياسى تۋرالى اقپارات ۇيىمنىڭ رەسمي جۋرنالىندا جارييالاندى. مەتٸندە شەكتەۋگە ٸلٸككەن شەنەۋنٸكتەردٸڭ اتى-جٶنٸ اتالماعان. گەرمانييادا شىعاتىن Bild جەنە Focus جۋرنالدارىنىڭ مەلٸمەتٸ بويىنشا, تٸزٸمدە تەرگەۋ كوميتەتٸنٸڭ باسشىسى الەكساندر باسترىكين, رەسەي گۆارديياسىنىڭ باسشىسى ۆيكتور زولوتوۆ, جازانى ورىنداۋ فەدەرالدىق قىزمەتٸنٸڭ ديرەكتورى الەكساندر كالاشنيكوۆ جەنە رەسەيدٸڭ باس پروكۋرورى يگور كراسنوۆ بار.
ولاردىڭ ەۋرووداق ەلدەرٸنە بارۋىنا تىيىم سالىنادى, ال وداق اۋماعىندا بار اكتيۆٸ بۇعاتتالادى.
تەلەفونمەن بولعان باسپاسٶز بريفينگٸندە اقش پرەزيدەنتٸ دجو بايدەن ەكٸمشٸلٸگٸنٸڭ ٶكٸلٸ رەسەي شەنەۋنٸكتەرٸ مەن كومپانييالارىنا سانكتسييا سالعانىن مەلٸمدەدٸ. رەسمي ۆاشينگتون رەسەي ناۆالنىيعا ۋ بەرۋ وقيعاسىنا رەسەي بيلٸگٸنٸڭ قاتىسى بار دەپ سانايدى.
بريفينگتە اق ٷي ٶكٸلٸ بايدەن ەكٸمشٸلٸگٸ مەسكەۋمەن قارىم-قاتىناسىن قايتا تٷزۋگە يا ۋشىقتىرۋعا تىرىسپايتىنىن, تەك باسقا ەرٸپتەس ەلدەرمەن بٸرلەسٸپ "شەكتەن اسىپ كەتكەن جاعدايدا رەسەيدٸ جاۋاپقا تارتاتىنىن" ايتتى. Bloomberg اگەنتتٸگٸنٸڭ حابارلاۋىنشا, اقش رەسەيگە جاڭا سانكتسييا سالۋدى جوسپارلاپ وتىر.
- كرەملدٸ ٶتكٸر سىناپ جٷرگەن "جەمقورلىقپەن كٷرەس قورىنىڭ" جەتەكشٸسٸ الەكسەي ناۆالنىي "نوۆيچوك" ۋىمەن ۋلانىپ, گەرمانييادا ۇزاق ەمدەلگەن سوڭ 17 قاڭتاردا مەسكەۋگە ورالعان جەرٸندە قاماۋعا الىنعان. كەيٸن جازانى ٶتەۋ قىزمەتٸنٸڭ تالابىمەن مەسكەۋ سوتى ونىڭ 2013 جىلعى شارتتى جازاسىن تٷرمە جازاسىنا الماستىرىپ, وپپوزيتسيونەر كولونيياعا جٸبەرٸلدٸ.
- جازانى ٶتەۋ قىزمەتٸ ناۆالنىي شارتتى جازا ەرەجەلەرٸن بۇزدى دەپ سانايدى, وپپوزيتسييالىق ساياساتكەر مۇنى جوققا شىعارادى. ەۋروپاداعى ادام قۇقىقتارى سوتى بارلىق دەڭگەيدەگٸ سوتتار ٸستٸ قاراعانشا, ناۆالنىيدى بوساتۋدى تالاپ ەتكەن.
