Ulybritaniia irandyq úsh general men qarý-jaraq óndirýmen ainalysatyn bir firmaǵa sanktsiia saldy. Buǵan deiin Reseidiń iran drondaryn Ýkrainadaǵy soǵysta paidalanyp jatqany jóninde aqparat shyqqan, dep habarlaidy Azattyq.
Britan qarjy ministrligi sanktsiia tizimine Shahed drondaryn óndiretin Shahed Aviation Industries kompaniiasyn da engizdi. Keiingi aptalarda Resei armiiasynyń ýkrain qalalary men energiia nysandaryn dál osy drondarmen atqylaǵany habarlanǵan. Londonnyń aitýynsha, drondar Reseige "Ýkraina aýmaǵyn zańsyz basyp kirýge paidalaný úshin" berilip otyr.
Beisenbi kúni Tegeranǵa sanktsiiany kúsheitý týraly sheshimdi Eýroodaq maquldaǵan. Bul jóninde Tvitterde Eýroodaqqa tóraǵalyq etip jatqan Chehiia basshylyǵy habarlady. Keiin sheshim Eýropa jýrnalynda jariialanyp, kúshine endi.
Shahed Aviation Industries men úsh irandyq general Eýropa sanktsiiasyna da engen. Bular: Iran qarýly kúshteri bas shtabynyń ókilderi general-maior Muhammed Hýsein Bageri, qorǵanys ministrligi janyndaǵy ónerkásip-zertteý bóliminiń jetekshisi Saied Hodjatolla Goreishi jáne islam revoliýtsiiasy saqshylar korpýsynyń aeroǵarysh kúshterine jetekshilik etetin Saied Agadjani. Olardyń Eýroodaq aimaǵyndaǵy esepshottary buǵattalyp, Eýroodaq elderine barýyna tyiym salynady.
Keiingi kúnderi Resei Ýkrainaǵa shabýylda irandyq "Shahed-136" drondaryn paidalanyp jatyr. Degenmen Máskeý de, Tegeran da aqparatty teristep keledi.
