Búgin Niderlandynyń Zeist qalasynda fýtzaldan 2022 jylǵy Eýropa chempionatynyń finaldyq kezeńiniń jerebesi tartylyp, Qazaqstan quramasynyń qarsylastary anyqtaldy, dep habarlaidy QazAqparat UEFA saityna silteme jasap.
Qazaqstan quramasy V tobynda synǵa túsetin boldy.
Qarsylastary - Italiia, Sloveniia jáne Finliandiia. Qazaqstandyq fýtzalshylar 20 qańtarda Sloveniiamen kezdesedi. Odan keiin 24 qańtarda Finliandiia, 28 qańtarda Italiiamen sheberlik baiqasady.
Ózge toptardaǵy quramalar bólinisi tómendegishe:
A toby: Niderlandy, Serbiia nemese Belarýs, Ýkraina, Portýgaliia
C toby: Resei, Polsha, Slovakiia, Horvatiia
D toby: Grýziia, Ispaniia, Ázerbaijan, Bosniia jáne Gertsegovina
Buǵan deiin habarlanǵandai, jerebe tartý rásimi UEFA.tv arnasynda tikelei efirden kórsetildi. Shara elorda ýaqytymen saǵat 22:00-de bastaldy.
Serbiia men Belarýs quramalary taǵy bir joldamany sarapqa salady. Oiyndar 14 jáne 17 qarasha kúnderine belgilengen.
Qurlyqtyq doda 2022 jyldyń 19 qańtary men 6 aqpany aralyǵynda Niderlandynyń Amsterdam jáne Groningen qalalarynda ótkiziledi. Onda barlyǵy 16 qurama baq synaidy.
Aita keteiik, qazaqstandyq fýtzalshylar Eýropa birinshiliginde 2016 jyly alǵash ret qatysty. Sol jyly toptyq kezeńde Reseiden 1:2 esebimen jeńilip, Horvatiiadan 4:2 esebimen basym tústi. Odan keiin shirek finalda Italiiany 5:2 esebimen súrindirdi. Jartylai finalda Ispaniiaǵa 3:5 esebimen jol berdi. Al 3-oryn úshin saiysta Serbiiany 5:2 esebimen jeńip, qola júldeger atandy.
2018 jylǵy qurlyqtyq dodada B tobynda Polshany 5:1 esebimen jeńse, Reseimen 1:1 esebine qanaǵat bildirdi. Al shirek finalda Serbiiadan 3:1 esebimen ailasyn asyrdy. Jartylai finalda Ispaniiamen negizgi kezeńde 5:5 esebimen teń oinap, penaltiden 1:3 esebimen ese jiberdi.
