Búgin fýtboldan 2020 jylǵy Eýropa chempionaty irikteý satysynyń sońǵy týrynda Qazaqstan quramasy syrt alańda Shotlandiiamen kezdesedi, dep habarlaidy QazAqparat.
Qazaqstandyq fýtbolshylar óz alańynda atalmysh qarsylasyn alǵashqy týrda 3:0 esebimen oisyrata jeńdi. Shotlandiia quramasy sol ketken eseni búgin qaitarýǵa tyrysatyny anyq. Búgingi kezdesýdiń qos qurama úshin de mańyzy zor. Ekeýiniń bireýi jeńiske jetken jaǵdaida úshinshi oryn sol quramaǵa buiyrady.
Shotlandiia atalmysh irikteý satysynyń alǵashqy oiynynda Qazaqstannan jeńilgennen keiin táp-táýir nátijege qol jetkizdi. Tórt kezdesýde jeńiske jetse, qalǵanynda Belgiia jáne Resei sekildi azýly qarsylastaryna ese jiberdi. Búgingi kúni 12 upai jinap, týrnir kestesinde úshinshi orynda tur. Shotlandiia quramasy úshin búgin teń nátije tirkelse de jetip jatyr. Degenmen olar jaǵdaiyn budan da jaqsartyp alýy úshin baryn salatyny anyq.
Búgingi tańda Shotlandiia quramasy sapynda kóptegen jas fýtbolshylar el namysyn qorǵaýǵa múmkindik alyp keledi. Aita keterligi, olardyń kópshiligi Angliia Premer-ligasynda oiyn kórsetedi. Tumandy Albiondaǵy atalmysh dop dodasy álemde úzdik retinde baǵalandy. Sondyqtan olardyń sheberlik deńgeiin joǵary baǵalaýǵa negiz bar. Mundai fýtbolshylar qatarynda «Liverpýl» namysyn qorǵaityn Endriý Robertson, «Blekbern Rovers» oiynshysy Charli Malgriý, «Aston Villadan» Djon Maklinn, «Saýtgemptonnan» Stiýart Armstrong sekildi jigitter óz quramasyn órge súireidi degen senim bar.
Jankúierler Shotlandiia quramasy jaiynda jaqsy biledi. Burynǵy jyldarda olar álemdik dodalarda jii boi kórsetip jatatyn. Alaida sońǵy kezeńde atalmysh qurama álem jáne qurlyq chempionaty finaldyq kezeńine shyǵa almai keledi. Aitalyq, olar álem chempionatynda 2002 jyldan beri baq synaýdan shet qalyp júrse, Eýropa úzdikteriniń qatarynda 2000 jyldan bastap boi kórsetken joq. Degenmen irikteý kezeńderinde óz tobynda joldamaǵa qol sozymda qalyp qoiyp júrdi.
Qazaqstan biyl tórtinshi márte Eýropa chempionaty irikteý satysyna qatysyp otyr. Alǵash 2008 jyly 8 komanda arasynda 10 upai jinap, altynshy orynǵa taban tiregen edi. 2012 jyly alty komanda arasynda 4 upaimen besinshi, 2016 jyly alty komanda arasynda 5 upaimen besinshi oryn aldy. Biyl odan joǵary nátijege qol jetkizýge múmkindigi bar. Ony búgingi oiyn barysy tarazylaityn bolady.
Shotlandiia jáne Qazaqstan quramalary arasyndaǵy kezdesý elorda ýaqytymen 01.45-te bastalady. Bul oiyn Qazsport telearnasynan tikelei efirde kórsetiledi. Sondai-aq, búgin I tobynda Belgiia men Kipr, San-Marino men Resei quramalary kezdesedi.
