Astanada jol apatynan mert bolǵan Oljas Súleimenovtiń nemeresi - Eskendir Súleimenovtiń anasy ulyna qatysty sottan tek ádil úkim kútetinin aitty, dep habarlaidy QazAqparat tilshisi.
«Ózimiz jaily pikirlerdi oqyp otyrsaq, keibir adamdar «qazir bular minekei, uldarynyń qunyn aityp jatyr» degen sózder kezdesip qalady. Olai emes! Eshqandai shyǵynnyń ótelgenin qalamaimyz. Sýdia bizge «materialdyq shyǵyndy aityńyzdar» degennen keiin ǵana osylai dedik. Eger olai bolsa, bizge eshqandai materialdyq shyǵyndy óteýdiń qajeti joq. Bizge tek ádiletti úkim kerek. Ol (aiyptalýshy Muhitova - avt.) jol júrý erejesin buzǵany úshin laiyqty jazasyn alsyn deimiz. Boldy!», - dedi búgingi sot otyrysynan keiin tilshilerge bergen suhbatynda marqum Eskendir Súleimenovtiń anasy Leila Súleimenova.
Eske sala ketsek, osy jyldyń maýsymynda Astanadaǵy jol apatynda Oljas Súleimenovtiń 26 jastaǵy nemeresi Eskendir Súleimenov mert bolǵan edi. Eskendir tizgindegen mototsikl qiylysqa shyqqan kólikke soǵyldy.
Arada kóp ótpei Astana qalalyq Ishki ister departamenti apatqa sebepker bolýy múmkin Hyundai avtokóliginiń iesi, 29 jastaǵy astanalyq kelinshekke qatysty tergeý amaldary júrip jatqanyn habarlaǵan edi.
Sondai-aq, qalalyq politsiia departamenti Eskendir Súleimenovtiń mototsikly soǵylǵan júrgizýshi Qyzylorda oblystyq Ishki ister departamenti bastyǵynyń qyzy ekenin rastaǵan.
Aita ketsek, 12 qazanda Oljas Súleimenovtiń nemeresiniń ólimine qatysty sot protsesi bastalyp, Eskendir Súleimenov qaza tapqan jol apaty boiynsha sottalýshy Malika Muhitova marqumnyń ata-anasynan keshirim suraǵan edi.
Al búgingi sot otyrysynda Eskendir Súleimenovtiń týystary 14 mln teńge kóleminde ótemaqy talap etti.
