Jyl basynan beri esirtkini nasihattaý nemese jarnamalaýdyń 48 faktisi anyqtaldy. Bul týraly QR IIM Esirtki qylmysyna qarsy is-qimyl departamentiniń basqarma bastyǵy Berikhan Nurǵaliev aitty, dep habarlaidy "Ult aqparat".
«Jyl basynan beri Internet arqyly esirtki satý faktisi boiynsha 18 qylmystyq is tirkelip, ekeýi sotqa jiberildi. Máselen, Mańǵystaý oblysynda sintetikalyq esirtkini taratqany jáne jarnamalaǵany úshin 19 jáne 22 jastaǵy eki jigit ustaldy. Olar graffiti tańbalap, belgiler qaldyryp otyrǵan. Kúdiktiniń kishisi jarnamalyq graffiti tańbalap, 9 belgi qaldyrǵan. Al ekinshi kúdikti ustalǵan kezde jasyryn jerlerge 40 iri jáne bir rettik dozany qoiyp úlgergen», - dedi ol IIM baspasóz qyzmeti alańynda ótken brifing barysynda.
Onyń atap dereginshe, sintetikalyq zattardy jasyryn jerlerge qoiyp júrgen eki adam ustaldy.
«Ótken jyldan bastap esirtkini nasihattaǵany nemese zańsyz jarnamalaǵany úshin qylmystyq jaýapkershilik engizildi. 6 jylǵa deiin bas bostandyqtan aiyrý jazasy qarastyrylǵan. Jyl basynan beri mundai 48 qylmys tirkeldi. Aitalyq, Almatyda 29 jastaǵy jigit ustalyp, onyń zattaryn tintý barysynda esirtki taratatyn saittarǵa silteme jazylǵan japsyrmalar tárkilendi», - dedi Berikhan Nurǵaliev.
