Áleýmettik jelilerde 17 qarashada álemde jappai kibershabýyl bolyp, bank shottaryndaǵy aqsha joǵalady, al internet úsh aiǵa deiin óshiriledi degen aqparat tarady. Osyǵan bailanysty jurtshylyqqa azyq-túlik pen sý qoryn jinaýǵa keńes berilgen. Alaida bul málimetter shyndyqqa janaspaidy. Ortalyq kommýnikatsiialar qyzmetiniń Jalǵan aqparatqa qarsy is-qimyl ortalyǵy qaýesettiń qaidan shyqqanyn anyqtap, onyń negizgi tustaryn joqqa shyǵardy, dep habarlaidy ult.kz.
Ortalyqtyń málimetinshe, dúrbeleńge sebep bolǵan alǵashqy jazba 1 qarashada X áleýmettik jelisinde jariialanǵan. Wesley laqap atymen tirkelgen qoldanýshy «darknettegi anonimdi derekkózge» silteme jasap, aldaǵy tsifrlyq apat týraly habar taratqan. Keiin oǵan keibir elder tótenshe jaǵdaiǵa daiyndalýǵa keńes berdi degen aqparat qosylyp, qaýeset odan ári órshigen.
Mamandar bank shottaryndaǵy qarajatty bir ǵana kibershabýyl arqyly jappai joiý týraly málimdemeniń negizsiz ekenin túsindirdi. Bankterdiń derekteri birneshe ortalyqta saqtalady, al qarjy uiymdarynda aqparattyq júielerdi qalpyna keltirý josparlary bolýy tiis.
Internettiń úsh aiǵa óshiriletini týraly da resmi dálel joq. Braziliianyń Boatos.org faktcheking resýrsy mundai aqparatty rastaityn derekkóz tabylmaǵanyn habarlady.
Al 17 qarashaǵa qatysty shynaiy aqparat – AQSh-ta tótenshe jaǵdailar jónindegi habarlaý júiesiniń josparly synaǵy ótedi. Onyń barysynda radio men telearnalarda bir minýttyq synaq signaly beriledi. Bul sharanyń jahandyq kibershabýylǵa qatysy joq.
Qazaqstanda da internettiń óshiriletini týraly eskertý jasalmaǵan. Tótenshe jaǵdailar ministrligi mundai málimetti joqqa shyǵardy. «Qazaqtelekom» AQ jeliniń shtattyq rejimde jumys istep turǵanyn habarlady. Kibershabýyldy taldaý jáne tergeý ortalyǵy da qaýesettiń resmi derekkózderde rastalmaǵanyn málimdedi.
Mamandar azamattardy tekserilmegen aqparatty taratpaýǵa jáne «aqshańyzdy kibershabýyldan qorǵaimyz» degen kúmándi usynystarǵa senbeýge shaqyrady.
