Qaraǵandyda kóshede qart áieldiń altyn alqasyn ashyqtan-ashyq tartyp alǵan kúdikti jedel ustaldy. Ol urlanǵan áshekeidi politsiia qolǵa túsirgenge deiin lombardqa ótkizip úlgergen, dep habarlaidy ult.kz.
Polisia.kz málimetinshe, oqiǵa qala kósheleriniń birinde bolǵan. 39 jastaǵy jergilikti turǵyn moinynda altyn alqasy bar 63 jastaǵy áieldi baiqap, oǵan jaqyndaǵan. Keiin jábirlenýshiniń áshekeiin julyp alyp, oqiǵa ornynan qashyp ketken.
Jábirlenýshi birden politsiiaǵa habar bergen. Jedel-izdestirý sharalarynyń nátijesinde tártip saqshylary kúdiktiniń jeke basyn anyqtap, ony qolǵa túsirdi.
Jaýap alý kezinde er adam kinásin moiyndaǵan. Ol mundai qadamǵa qarjylyq qiyndyqqa bailanysty barǵanyn aitqan. Urlanǵan altyn alqany lombardqa ótkizip jibergeni de belgili boldy.
Qazir atalǵan derek boiynsha sotqa deiingi tergeý amaldary júrgizilip jatyr. Kúdikti ýaqytsha ustaý izoliatoryna qamaldy.
