Foto: Astana ákimdigi
Astanada LRT iske qosylǵan alǵashqy táýliktiń ózinde jolaýshylar tarapynan qaýipsizdik erejelerin óreskel buzý derekteri tirkeldi. Bul týraly City Transportation Systems (CTS) kompaniiasy habarlady.
Kompaniia málimetinshe, poiyzdardyń birneshe ret toqtap qalýyna jolaýshylardyń beibereket áreketteri sebep bolǵan. Atap aitqanda, keibir turǵyndar vagon esikteriniń jabylýyna ádeii kedergi keltirip, olardy qolmen ashýǵa tyrysqan. Sondai-aq shuǵyl tejeý jáne esikti ashý batyrmalaryn negizsiz basý jaǵdailary tirkelgen.
Júie tolyq avtomattandyrylǵandyqtan, mundai áreketter qaýip retinde baǵalanyp, poiyzdar avtomatty túrde toqtatylǵan. Bul dispetcherlik tekseris júrgizý úshin qajet bolǵan.
Tártip buzýshylar beinebaqylaý kameralary arqyly anyqtaldy. Jinalǵan materialdar kinálilerdi jaýapkershilikke tartý úshin quqyq qorǵaý organdaryna joldanǵan.
CTS kompaniiasy jolaýshylardy qoǵamdyq kóliktegi qaýipsizdik talaptaryn qatań saqtaýǵa shaqyrdy. Sondai-aq jelide joǵary kerneýli tok bar ekeni eskertilip, ereje buzýdyń sońy aýyr saldarǵa ákelýi múmkin ekeni aityldy.
