Májilis depýtaty Ermurat Bapi 2 sáýirde ótken Májilis otyrysynda Qazaqstan týyna arabsha jazý jazyp sýretke túsken nikabtaǵy qyzdardyń isine qatysty QR Bas prokýrory Berik Asylovqa depýtattyq saýal joldady. Ol saýalynda tý ustaǵan tórt áieldiń artynda turǵan kúshterdi, jalǵan týdy daiyndaýshylardy, ony taratýshylardy anyqtap, mundai qastandyqtyń jolyn kesý úshin, uiymdastyrýshylarǵa qatań jaza qoldanýy tiis ekenin aitty dep habarlaidy Ult.kz.
Ol ultymyzdyń qasterli muralaryna, myńdaǵan jyldyq salt-dástúrlerimizge shabýyl tolastamai tur dep esepteidi.
Foto: Májilis baspasóz qyzmetinen
"Munda bizdiń nazarymyzdy aýdarǵan – kók týdaǵy arab qarpindegi jazýdyń óte sapaly túrde, arnaiy baspa quralymen tańbalanýy. Demek, bul – jai ǵana turmystyq buzaqylyq, ádepsiz shekten shyǵýshylyq qana emes. Bul – bizdiń qoǵamymyzǵa, memlekettigimizge, ulttyq dástúrimiz ben biregeiligimizge jasalǵan ashyq jáne naqaq qarsylyq", -deidi depýtat Bapi.
Depýtat eldiń týyn búldirý arqyly jat piǵyldy dáriptemek bolǵan bul tórt qyz áldebir arandatýshy toptyń qurbany bolýy múmkin dep kúdiktenedi.
"Olar jastyq alańǵasyrlyqpen, álde materialdyq qyzyǵýshylyqpen nemese dini saýatsyzdyqpen jasaǵan bul óreskel zań buzýshylyqtyń tasasynda turǵan áldebir kereǵar kúshter bar siiaqty", -dep Ermurat Bapi: "Ákimshilik turǵydaǵy jazasyn alǵan tórt qyzdan buryn, osy qylmysty áreketti uiymdastyrýshylar jazaǵa tartylýy tiis", -dep esepteidi.
Depýtat osyndai túr-túsi burmalanǵan Qazaqstan týy Wildberries Russ marketpleisinde 5000 myń teńgeden erkin jáne ashyq saýdada satylyp jatqanyna alańdaýshylyq bildiredi.
Sonymen qatar, Ermurat Bapidyń pikirinshe bul oqiǵanyń arandatýshylyq mazmuny men memlekettik týdyń betinde qoldanylǵan simvolikanyń sipaty – onyń aldyn ala josparlanǵanyn, áldebir toptyń naqaq uiymdastyrǵanyn kórsetedi.
"Buǵan kim tapsyrys berdi? Uiymdastyrýshylardyń maqsaty qandai? Bul suraqtarǵa quqyq qorǵaý organdary naqty jaýap berýi tiis! Mundai arandatýshylyqtyń qaitalanýyna jol bermeý úshin tergeý-tekserý sharasy jan-jaqty júrgizilýi qajet", -dep aitqan depýtat jaýapty mekemeler kelesi sharalardy shuǵyl qolǵa alý kerek dedi.
1. Qoldanystaǵy zańnamaǵa sáikes, quqyq qorǵaý organdary oryn alǵan jaǵdaidy jiti tekserip, arandatýshylyqqa aldanǵan tórt áieldiń artynda turǵan kúshterdi, jalǵan týdy daiyndaýshylardy, ony taratýshylardy anyqtap, mundai qastandyqtyń jolyn kesý úshin, uiymdastyrýshylarǵa qatań jaza qoldanýy tiis!
2. Bekitilgen standartqa sáikes kelmeitin, resmi sipaty burmalanǵan memlekettik rámizdi satýǵa shyǵarǵan saýda oryndarynyń basshylyǵyn jaýapqa tartý kerek. Satylyp ketken týlardy jinap alyp, joiý qajet!
Sondai-aq, tiisti zańnamaǵa memlekettiligimizdi mansuqtaityn, qoǵamdy jikke bólýdi kózdeitin taýarlar satqan jekelegen marketpleisterge qarsy sanktsiia salýdy kózdeitin túzetýler ázirlep, ony zań normasyna engizý kerek.
3. Memleket radikaldy aǵymdardyń óreskel áreketterine baqylaýdy kúsheitip, dini qundylyqtardy burmalaýǵa qarsy sharalardy qatańdatý qajet. Ulttyq biregeilikti qorǵaýdyń júieli jáne jalpyǵa ortaq saiasatyn qalyptastyratyn ýaqyt jetti!
5. Zaiyrly bilim berý júiesin nyǵaitýdy, orta mektepterdegi dintaný sabaqtaryn ulttyq muralar negizinde júrgizý baǵdarlamasy daiyndalýy kerek!
Sonymen qatar, tiisti ýákiletti memlekettik organdar ulttyq mádenietti damytý, dástúrli kiim kiiý bastamalaryn qoldaý jáne jastar arasynda keń kólemde túsindirý jumystaryn júrgizýi qajet.
