Qazaqstan áleýmettik qarym-qatynas pen ekonomikanyń jańasha ári sapaly deńgeiine jyljyp keledi. Bul rette qoǵamda muǵalimder men pedagogikanyń róli men salmaǵy arta bereri aiqyn. Saiasattanýshy, Ulttyq qoǵamdyq senim keńesiniń múshesi Erlan Sairov Ustazdar kúni qarsańynda osyndai pikir bildirdi, dep habarlaidy QazAqparat.
«Álem tehnologiialyq sipaty ózgerip barady. Áleýmettik qarym-qatynas pen ekonomikanyń jańasha ári sapaly deńgeiine jyljyp kelemiz. Árine, bul rette muǵalimder men pedagogikanyń róli men salmaǵy arta bereri aiqyn. Aldaǵy kezeńde tulǵany tárbieleý men oqytýdyń ortalyq figýrasy – ustaz bolyp qalary haq. Sol sebepti, pedagogika men muǵalimderge qazirgi ýaqytta memlekettik deńgeide zor mańyz berilýde. Búgingi kúni pedagogika salasynda jetistikterimen birge problemalary da baryn bilip otyrmyz. Prezident Qasym-Jomart Toqaevtyń Qazaqstan halqyna Joldaýynda pedagogikanyń jańa róliniń negizgi tetikteri aiqyndalǵan», - dedi sarapshy Ustazdar kúnine arnalǵan «Prezident Qasym-Jomart Toqaevtyń Qazaqstan halqyna Joldaýy: muǵalimniń áleýmettik rólin arttyrý aspekti» taqyrybynda ótken dóńgelek ústelde.
Erlan Sairovtyń aitýynsha, salanyń damýy úshin memleket uiymdastyrýshylyq baǵytta jumysty jetildirip, qarjylandyrý mólsherin arttyryp keledi.
«Bárimiz biletindei, kelesi jyldan bastap muǵalimderdiń ailyǵy 25 paiyzǵa kóbeiedi. Osylaisha, 4 jyl boiy ustazdardyń tabysy eki esege ósedi. Synyp jetekshiligi úshin beriletin eńbekaqy eki esege artady. Demalys kúnderi uzarady. Bul qadamdar ustazdarymyzdy qanattandyrady degen senimdemin», - dedi ol.
Eske sala ketsek, osydan biraz ýaqyt buryn Úkimet otyrysynda «Pedagog mártebesi týraly» zań jobasy bekitilgen bolatyn.
.jpeg)