Armeniia astanasy Erevanda 25 qazanda Qazaqstan premer-ministri Baqytjan Saǵyntaev pen Qyrǵyzstan premer-ministri Sapar Isakovtyń kelissózi jalǵasady. Keshe olar jabyq túrde eki jaqty kelissóz ótkizgen.
Azattyqtyń Qyrǵyz redaktsiiasynyń Qyrǵyzstan úkimetiniń baspasóz qyzmetine silteme jasap habarlaýynsha, kelissózdiń alǵashqy kúninde eki jaqty yntymaqtastyq máseleleri talqylanǵan. Kelissóz týraly egjei-tegjeili habarlanbady.
Qazaqstandyq resmi BAQ-tyń jazýynsha, Saǵyntaev pen Isakov "eki jaqty ekonomikalyq yntymaqtastyq, sonymen qatar shekaradaǵy, kóliktegi, fitosanitariialyq jáne veterinariialyq baqylaý, keden jáne salyq qyzmetin basqarý salalaryndaǵy ózara áreket meselelerin Eýraziia ekonomikalyq odaǵy men Dúniejúzilik saýda uiymynyń erejeleri jáne normalaryna sai" retteitin jol kartasyna qol qoiýdy talqylap jatyr.
Qazaqstan men Qyrǵyzstan premerleri Erevandaǵy EAEO elderi úkimet basshylarynyń jiyny aiasynda kezdesip jatyr.
Jol kartasyn qurý týraly kelisim eki el premerleriniń 18 qazanda Astanada ótken kezdesýinde jasalǵan. Ol kezde jol kartasyn jasaýǵa eki el birinshi vitse-premerleriniń basshylyǵymen ministrlikter men vedomstvolar basshylarynan jumysshy toby qurylǵan.
10 qazannan bastap Qazaqstan taraby qyrǵyz shekarasynan azamattar men kólikterdi ótkizý tártibin kúsheitken. Sonyń saldarynan Qyrǵyzstannyń Chý jáne Talas oblystaryndaǵy baqylaý-ótkizý beketterinde adamdar men avtokólikter jinalyp, uzaq ýaqyt kezekte turýǵa májbúr bolǵan. Ásirese tez buzylatyn taǵam ónimderin tasityn úlken júk kólikteriniń júrgizýshileri qatty ziian shekken.
