Ankara Kievtiń "Qyrym platformasyn" qurý bastamasyn qoldaidy. Bul týraly Túrkiia prezidenti Rejep Taiyp Erdoǵan Stambýlǵa saparlaǵan Ýkraina prezidenti Vladimir Zelenskiimen kezdesýden keiin málimdedi. Bastama Resei anneksiialaǵan Qyrymdy Ýkrainaǵa qaita qosýdy kózdeidi, dep habarlaidy Azattyq.
Erdoǵan Túrkiianyń Ýkrainamen áriptestikti qoldaitynyn, munyń ózge elderge qarsy baǵyttalmaǵanyn atap ótti. Túrkiia prezidenti sondai-aq Ýkraina shyǵysyndaǵy ahýaldyń ýshyǵýyna alańdaýshylyq bildirip, jaǵdaidyń ońalatynyna úmittenetinin aitty.
Vladimir Zelenskii buǵan jaýap retinde Túrkiianyń Ýkraina sýverenitetine qoldaý bildirýi Kiev úshin asa mańyzdy dedi.
Kelissózderden keiin Ýkraina men Túrkiia arasyndaǵy strategiialyq keńestiń otyrysy ótti. Onyń nátijesi boiynsha taraptar ortaq deklaratsiia jariialady. Qujatta Kiev pen Ankara Ýkrainanyń halyqaralyq deńgeide moiyndalǵan aýmaǵyn qalpyna keltirý boiynsha jumystardy jalǵastyra beredi dep jazylǵan. Sonymen qatar eki el anneksiialanǵan túbekten kóshýge májbúr bolǵan qyrym tatarlarynyń ómirin jaqsartý jumystaryn júrgizetin boldy.
Ýkraina prezidenti Vladimir Zelenskiidiń Túrkiiaǵa sapary 9 sáýirde bastalǵan. Sol kúni Túrkiia men Resei prezidentteri telefonmen sóilesken. Resei prezidenti Vladimir Pýtin Ýkrainanyń "túiisý syzyǵynda qaýipti arandatý qimyldaryn jandandyrýyna" alańdaitynyn aitty.
Keiingi ýaqytta Ýkraina shyǵysyndaǵy Donbassta janjal tutanyp, osyǵan deiingi bitimniń bári joqqa shyqty. Túrli derekke qaraǵanda, Resei Ýkrainamen shekaralas aýmaqqa óz áskerin shoǵyrlandyrǵan. Máskeý áskerdiń eshkimge qaýip tóndirmeitinin aitady.
