Túrkiia prezidenti Rejep Erdoǵan memlekettik statistika institýtynyń jetekshisi Sait Erdal Dincherdi otstavkaǵa jiberdi. Qańtar basynda elde infliatsiia deńgeiiniń 19 jylda bolmaǵan deńgeige jetkeni týraly resmi málimet jariialanǵan. Statistika institýtynyń jetekshisi osy málimet shyqqan soń birneshe aptadan keiin qyzmetinen ketip otyr, dep habarlaidy Azattyq.
Dincherdiń ornyna institýt jetekshisi bolyp Erhan Chetinkaia taǵaiyndaldy. Ol buǵan deiin bankterdi retteitin mekeme tóraǵasynyń orynbasary bolǵan. Erdoǵan kadrlyq sheshiminiń mánin túsindirmedi.
3 qańtarda tutynýshy baǵa indeksi jeltoqsanda byltyrǵy jyldyń osy kezeńimen salystyrǵanda 36,1 paiyzǵa artqany týraly málimet jariialanǵan kezde Dincherdi úkimet te, oppozitsiia ókilderi de qatań synaǵan.
Oppozitsiia ómir súrý keminde eki ese qymbattap ketkenin aitsa, túrik aqparat quraldary Erdoǵan "eldegi ekonomikalyq daǵdarys aýqymynyń tym ulǵaitylyp kórsetkenine" narazy dep jazdy.
Sarapshylar Erdoǵannyń Ortalyq bank jumysyna aralasýy infliatsiiany ýshyqtyryp jiberdi dep sanaidy. Kóptegen elde ortalyq bankter paiyzdyq mólsherlemeni arttyryp, aqsha-nesie saiasatyn qatańdatý arqyly infliatsiiany tejegisi keledi. Al Erdoǵannyń aitýynsha, joǵary paiyz mólsherlemesi infliatsiiany týdyrǵandyqtan, ony azaitýǵa májbúr ekenin aitqan.
