Qazaqstandyq eki boksshy WBA jáne IBF nusqalary boiynsha birinshi aýyr diviziondaǵy álemniń eks-chempiony, reseilik Denis Lebedevtiń (34-2, 23KO) aiqasynyń anderkartynda jekpe-jek ótkizedi, dep habarlaidy "Ult aqparat".
VKontakte áleýmettik jelisindegi «Qazaqstannyń kásipqoi boksy» paraqshasyndaǵy aqparatqa sáikes, sýper orta salmaqta óner kórsetetin Aidos Erbosynuly (12-0, 8KO) men jartylai orta salmaqtaǵy Nursultan Jańabaevtyń (8-0, 5KO) qarsylastary ázirge belgisiz. Qos boksshy da Almaty mańynda ornalasqan AIBA-nyń Boks akademiiasynda jattyǵýǵa kirisip ketti.
«27 jastaǵy A.Erbosynuly 12 aiqasta 12 ret jeńiske jetken (8-i – nokaýtpen). Onyń enshisinde WBA Inter-Continental jáne WBO Global titýldary, sondai-aq 2018 jyldyń jeltoqsanynda Máskeýde belgiialyq Iliias Achergidi (12-4-1, 6KO) nokaýtqa túsirgennen keiin qol jetkizgen WBC Asia beldigi bar. Al 26 jastaǵy N.Jańabaev WBA Inter-Continental, WBO Oriental jáne IBF Pan Pacific beldikterine ie. Ol ringke 8 ret shyǵyp, barlyǵynda jeńiske jetken (beseýi – nokaýtpen)», - delingen aqparatta.
Boks keshi 21 jeltoqsan kúni Reseidiń Krasnoiarsk qalasynda ótedi. Onyń basty aiqasynda Lebedevtiń qarsylasy Ońtústik Afrika ókili Tabiso Mchýný (21-5, 13KO) bolmaq.
Aita keteiik, Lebedevke WBA jáne IBF nusqalary boiynsha birinshi aýyr salmaqtaǵy titýldar tiesili bolyp kelgen.
