Búgin Májiliste «Jeke qosalqy sharýashylyq týraly» zań jobasyn talqylaý kezinde sút ónimderiniń sapasyna qatysty problemalar aityldy, dep habarlaidy QazAqparat tilshisi.
Atalǵan qujatty tanystyrý barysynda Májilis depýtaty Erlan Sairov EAEO tehnikalyq reglamenti aiasynda Qazaqstanda jeke qosalqy sharýashylyqtardan sút qabyldaý máselesin kóterdi.
«2025 jylǵy 1 qańtardan bastap Eýraziialyq ekonomikalyq odaq tehnikalyq reglamenti aiasynda Qazaqstanda jeke qosalqy sharýashylyqtardan sút zaýyttaryna sút qabyldaýǵa tyiym salynady. Ózińiz bilesiz, bizdiń qosalqy sharýashylyqtardyń sút ónimi tamaq ónimi qaýipsizdigi talaptaryna sáikes kelmeidi. Búginde jeke qosalqy sharýashylyqtarda 70 paiyzy, iaǵni 5 mln-ǵa jýyq adam aýylda osy sútti ótkizip, nápaqasyn taýyp otyr. Endi, 2025 jylǵa deiin úsh jyl qaldy, osyny sheshý úshin qandai qadamdar jasaldy? Úsh jyldyń ishinde bul máseleni sheshýge bizdiń jaǵdaiymyz jete me? Sebebi bul máseleniń áleýmettik mańyzy zor», - dedi E. Sairov.
Óz kezeginde Aýyl sharýashylyǵy ministri Erbol Qarashókeev osy másele óte kúrdeli ekenin, sondai-aq úsh jyldyń ishinde atalǵan problemany sheshý mindetti bolyp turǵanyn atap ótti.
«2025 jyldan bastap bizde sút óńdeý zaýyttary jeke qosalqy sharýashylyqtardan jinap otyrǵan súttiń sapasyna mindettemeni kóteredi. Osy oraida bizdiń 40-50 paiyz sút óńdeitin zaýyttardyń qabyldap otyrǵan ónimdi jeke qosalqy sharýashylyqtardan ala almai qalady. Sol sebepten búgin qarastyryp otyrǵan zań jobasy óte mańyzdy. Qazirgi tájiribeni qaraityn bolsaq, Tatarstanda, Bashqurtstanda tiisti zańdardyń aiasynda jeke qosalqy sharýashylyqtardaǵy iri qaranyń, súttiń sapasyn kóterýde biraz jumys atqardy. Sol sebepti Tatarstanǵa saparmen baryp, tájiribesimen tanyspaqpyn», - dedi ministr.
E. Qarashókeev atalǵan máseleni júieli túrde sheshý kerek ekenin atap ótti. Bul baǵyttaǵy tiisti jumystardy kooperatsiia arqyly sheshýge bolady.
«Tanystyrylyp otyrǵan zań jobasynyń maqsattarynyń biri atalǵan máselelerge de arnalǵan. Jeke qosalqy sharýashylyqtardyń kooperativterge birigip, osy arqyly memlekettik qoldaý alyp, ózderiniń ónimderiniń sapasyn kótere alady», - dedi vedomstvo basshysy.
Osy baǵytta asyl tuqymdy iri qara maldy kóbeitý, mamandardy tartý jáne basqa da jumystardy kooperativter arqyly biriktirip, jeke qosalqy sharýashylyqtarǵa qoldaý jasalmaq.
