Saýd Arabiiasynyń syrtqy ister ministrligi Resei prezidenti Vladimir Pýtinniń "Saýd Arabiiasy taqtatas munai óndiretin básekelesterin naryqtan yǵystyrý úshin OPEK+ kelisiminen shyqty" degen málimdemesin joqqa shyǵardy.
Arabnews saitynyń jazýynsha, syrtqy ister ministri Feisal ben Farhan Ál Saýd Pýtinniń "málimdemesinde aitylǵandardyń bári ótirik" degen. Hanzada Pýtin málimdemesi emes, Kreml saityndaǵy stenogrammadan alynǵan aqparat quraldaryndaǵy habarlamaǵa súiengen.
Ministrdiń aitýynsha, Resei OPEK+ munai óndirýshi elderdiń kelisimin uzartýdan bas tartyp, 6 sáýirde bolatyn uiym otyrysynda durys sheshim qabyldaýǵa shaqyrǵan.
Buǵan deiin OPEK-ke múshe elder jáne Reseidiń energetika ministriniń kelissózine qatysqandardyń biri Bloomberg agenttigine reseilik ministr kelisimnen shyǵatynyn habarlaǵan kezde shetel áriptesteriniń qatty tańǵalyp, daǵdaryp qalǵanyn aitqan bolatyn.
Osy apta sońynda Máskeý men Er-Riiad arasynda kelissóz bolatyny týraly habar taraǵan kezde Brent markaly munai barreline 35 dollarǵa deiin qymbattady. Onyń aldynda 22 dollarǵa deiin quldyrap ketken edi. Resei munai óndirýdi azaitýdan bas tartqannan keiin halyqaralyq naryqta munai baǵasy kúrt arzandaǵan. Buǵan deiin reseilik BAQ Máskeý naryqtan AQSh-tyń taqtatas munaiyn yǵystyrǵysy keldi dep jazǵan.
