Eýroodaqtyń atqarýshy organy - Eýropa komissiiasy koronavirýs indetiniń jaiylýyn tejeý úshin odaqtyń vizasyz aimaǵynda qozǵalysqa shekteýdi keminde 15 mamyrǵa deiin uzartýǵa shaqyrdy.
Eýropa komissiiasynyń vitse-prezidenti Margaritis Shinas 8 sáýir kúngi málimdemesinde odaqqa múshe elderdiń áleýmettik oqshaýlaný sharalaryn sátti júzege asyrǵanyn atap ótip, shekteý sharalaryn jalǵastyrýdyń mańyzyna toqtalǵan.
"Alǵashqy nátijesin de kórip otyrmyz, sol sebepti saiahattaýǵa shekteý merzimin uzartý indettiń jaiylý qaýpin azaitý úshin qajet" dedi ol.
Qazir Eýropa Odaǵy azamattary, odaq rezidentteri, EO azamattarynyń otbasy músheleri, tranzittik jolaýshylar, diplomattar, densaýlyq saqtaý salasy mamandary, gýmanitarlyq sala ókilderi, otbasy jaǵdaiyna bailanysty jol júrýge májbúr azamattar ǵana odaq aýmaǵyna kire alady.
Buǵan deiin Eýroodaqtyń keibir músheleri koronavirýstyń ekonomikaǵa yqpalyn azaitý úshin shekteý sharalaryn birtindep azaitatynyn málimdegen edi. Alaida odaqtyń ózge músheleri shekteý sharalaryn azaitsa, virýs budan da jyldam tarap, másele baqylaýdan shyǵa ma dep qaýiptenedi.
Odaq aýmaǵynda koronavirýstan 51 myń adam kóz jumǵan. Virýstan Italiia, Ispaniia, Frantsiia qatty zardap shekken.
