Koronavirýstyń taraýyn tejeý úshin Eýropa elderi shekteý sharalaryn kúsheitip jatyr. 2 qarashadan bastap Germaniiada keminde bir aiǵa sozylatyn jartylai lokdaýn engizildi.
Indet bastalǵaly beri koronavirýstan qaitys bolǵandar sany 10 millionnan asty.
AQSh-tyń bas infektsionist dárigeri Entoni Faýchi AQSh-ty "uzaq ta qaharly qys kútip tur" dep málimdedi.
"Bizdi alda áli talai aýyrtpalyq kútip tur. Asyly, juldyzymyz ońynan týyp turǵan joq. Kúzgi hám qysqy kezeńge ótkende adamdar úidiń, iaki bir obekttiń ishine shoǵyrlanady. Bálkim, siz budan qiyn jaǵdaiǵa tap bolmaǵan da shyǵarsyz" dedi Faýchi Washington Post gazetine bergen suhbatynda.
Prezident sailaýyna sanaýly kún qalǵanda Donald Tramp "AQSh bálkim, indettiń úshinshi tolqynyn ótkerip jatqan bolar, biraq qaýipti sátterdiń bári artta qaldy" dep sendirýge tyrysty.
AQSh-ta indet bastalǵaly beri 9,28 mln adamnan koronavirýs anyqtalyp, 230 937 naýqas qaitys bolǵan. Amerika koronavirýs juqtyrǵandar men Covid-ten qaitys bolǵandar sany jaǵynan da álemde birinshi orynda tur. Elde aýrýhanaǵa túskender men adam ólimi kóbeiip jatyr.
Eýropada naýqastar sanynyń jyldam artýy meditsina mekemelerine salmaq túsirip, bilikti sharalardy qatańdatýǵa itermelep otyr. Aimaqta kún saiyn 240 myńnan astam naýqas tirkelip júr. Eýropanyń onnan astam elinde aýrýhanaǵa jatqyzylǵandar sany rekordtyq kórsetkishke jetken.
30 qazanda Frantsiia lokdaýn engizgen.
