QR Energetika vitse-ministri Jandos Nurmaǵanbetov Senat otyrysynan keiin BAQ ókilderine bergen suhbatynda Qazaqstanda salynýy múmkin AES-tiń orny týraly pikir bildirdi, dep habarlaidy QazAqparat.
«Atom elektr stansasyn salatyn alań tańdap alynǵan joq. Salý máselesi qaralyp jatyr. Júrgizilgen esepter Qazaqstannyń ekologiialyq kodekste qoiylǵan mindetterge qol jetikizýi úshin syrtqa qaldyq tastamaityn jańa generatsiia salý qajettigin kórsetti.
Bizdegi generatsiialaýdyń negizgi bóligi sovet ýaqytynda salynǵan. Jańa salynǵandary sondai kóp emes. Sondyqtan stansalardyń eskirý problemasy bar. Iaǵni jańa generatsiialar alý qajet. Kómirsýteksiz generatsiiaǵa osy atom stansasy jatady. Sondyqtan atom stansasyn salý máselesi qaralyp otyr», - dedi ol.
Aitýynsha, ázirge salynýy múmkin atom stansasynyń qurylys alańy, stansanyń kólemi men mólsheri anyqtalǵan joq.
«Meniń oiymsha naqty sheshim biyl qabyldanatyn bolýy kerek», - dedi vitse-ministr.
