Halyqaralyq qarjy uiymdary kómir stansalarynyń qurylysyn qarjylandyrýdan bas tartyp otyr. Ortalyq kommýnikatsiialar qyzmetinde ótken brifingide QR Energetika ministrligi elektr energetikasyn damytý departamentiniń direktory Aidos Dáribaev osyndai málimet aitty, dep habarlaidy QazAqparat.
«Jańartylatyn energiia kózderiniń turaqsyzdyǵyn eskersek, bizge eldiń energiia júiesindegi bazalyq kózderdi qarastyrý kerek. Halyqaralyq qarjy uiymdary kómir stansalaryn salý jobalarynan búkil jerde bas tartyp jatqandyqtan kómir generatsiiasyn ári qarai engizý múmkindigimiz shektelip otyr. Osyǵan bailanysty jiyntyq qýaty 2,4 GVt bolatyn atom elektr stansasy bazalyq generatsiianyń jańa kózi retinde qarastyrylyp otyr», - dedi ministrlik ókili.
Sondai-aq, ol 2035 jylǵa qarai Qazaqstanda iske qosylýy josparlanǵan energetikalyq qýattardyń qurylymy týraly málimet usyndy.
«2035 jylǵa qarai 6,5 GVt jańartylatyn energiia kózderin, 5 GVt-tan astam gaz generatsiiasyn, 2 GVt sý generatsiiasyn, 1,5 GVt kómir generatsiiasyn, 2,4 GVt atom generatsiiasyn salý kózdelgen. Bul bizge bazalyq qýattardyń da, retteýshi qýattardyń da tapshylyǵyn tómendetýge múmkindik berip, eldiń energiia júiesin shektes elderdiń retteýinen táýelsiz etedi», - dedi departament direktory.
Aitýynsha, bul jospar 2035 jylǵa deiingi elektr energiiasyn óndirýdiń boljamy boiynsha, kómirdiń úlesi 40 paiyzǵa deiin azaitýǵa tiis.
«Qazir onyń úlesi shamamen 70 paiyzdai. Al jańartylatyn energiia kózderiniń úlesi 23 paiyzǵa deiin, gaz generatsiiasynyń úlesi 18 paiyz, sý elektr stansalarynyń úlesi 7 paiyz, AES úlesi 12 paiyz bolady», - dedi Aidos Dáribaev.
