حالىقارالىق قارجى ۇيىمدارى كٶمٸر ستانسالارىنىڭ قۇرىلىسىن قارجىلاندىرۋدان باس تارتىپ وتىر. ورتالىق كوممۋنيكاتسييالار قىزمەتٸندە ٶتكەن بريفينگٸدە قر ەنەرگەتيكا مينيسترلٸگٸ ەلەكتر ەنەرگەتيكاسىن دامىتۋ دەپارتامەنتٸنٸڭ ديرەكتورى ايدوس دەرٸباەۆ وسىنداي مەلٸمەت ايتتى, دەپ حابارلايدى قازاقپارات.
«جاڭارتىلاتىن ەنەرگييا كٶزدەرٸنٸڭ تۇراقسىزدىعىن ەسكەرسەك, بٸزگە ەلدٸڭ ەنەرگييا جٷيەسٸندەگٸ بازالىق كٶزدەردٸ قاراستىرۋ كەرەك. حالىقارالىق قارجى ۇيىمدارى كٶمٸر ستانسالارىن سالۋ جوبالارىنان بٷكٸل جەردە باس تارتىپ جاتقاندىقتان كٶمٸر گەنەراتسيياسىن ەرٸ قاراي ەنگٸزۋ مٷمكٸندٸگٸمٸز شەكتەلٸپ وتىر. وسىعان بايلانىستى جيىنتىق قۋاتى 2,4 گۆت بولاتىن اتوم ەلەكتر ستانساسى بازالىق گەنەراتسييانىڭ جاڭا كٶزٸ رەتٸندە قاراستىرىلىپ وتىر», - دەدٸ مينيسترلٸك ٶكٸلٸ.
سونداي-اق, ول 2035 جىلعا قاراي قازاقستاندا ٸسكە قوسىلۋى جوسپارلانعان ەنەرگەتيكالىق قۋاتتاردىڭ قۇرىلىمى تۋرالى مەلٸمەت ۇسىندى.
«2035 جىلعا قاراي 6,5 گۆت جاڭارتىلاتىن ەنەرگييا كٶزدەرٸن, 5 گۆت-تان استام گاز گەنەراتسيياسىن, 2 گۆت سۋ گەنەراتسيياسىن, 1,5 گۆت كٶمٸر گەنەراتسيياسىن, 2,4 گۆت اتوم گەنەراتسيياسىن سالۋ كٶزدەلگەن. بۇل بٸزگە بازالىق قۋاتتاردىڭ دا, رەتتەۋشٸ قۋاتتاردىڭ دا تاپشىلىعىن تٶمەندەتۋگە مٷمكٸندٸك بەرٸپ, ەلدٸڭ ەنەرگييا جٷيەسٸن شەكتەس ەلدەردٸڭ رەتتەۋٸنەن تەۋەلسٸز ەتەدٸ», - دەدٸ دەپارتامەنت ديرەكتورى.
ايتۋىنشا, بۇل جوسپار 2035 جىلعا دەيٸنگٸ ەلەكتر ەنەرگيياسىن ٶندٸرۋدٸڭ بولجامى بويىنشا, كٶمٸردٸڭ ٷلەسٸ 40 پايىزعا دەيٸن ازايتۋعا تيٸس.
«قازٸر ونىڭ ٷلەسٸ شامامەن 70 پايىزداي. ال جاڭارتىلاتىن ەنەرگييا كٶزدەرٸنٸڭ ٷلەسٸ 23 پايىزعا دەيٸن, گاز گەنەراتسيياسىنىڭ ٷلەسٸ 18 پايىز, سۋ ەلەكتر ستانسالارىنىڭ ٷلەسٸ 7 پايىز, اەس ٷلەسٸ 12 پايىز بولادى», - دەدٸ ايدوس دەرٸباەۆ.
