Ortalyq kommýnikatsiialar qyzmetinde ótken brifingide QR Energetika ministri Bolat Aqsholaqov benzin men dizeldiń aktsizdik quny ózgerýi múmkin ekenin rastady. Aitýynsha, bul janarmaidyń 180 kúndik shekti baǵasyna áser etpeidi, dep habarlaidy QazAqparat.
«Men brifingtiń basynda benzinniń búkil markasyna jáne dizel otynyna naqty baǵa belgilegenimizdi aittym. Sáikesinshe, aktsizder qymbattaǵannyń ózinde ol osy belgilengen baǵanyń ishinde bolýy kerek dep usynyp otyrmyz. Iaǵni, aktsizdiń qymbattaýy janarmaidyń bólshek saýdadaǵy aqyrǵy baǵasyn qymbattatpaýy kerek. Bul janarmai naryǵyndaǵy oiynshylardyń marjasyn qatai qaraý esebinen júredi. Qazir biz osy erejeler boiynsha jumys júrgizip jatyrmyz. Mejeli 180 kúnniń ishinde naryqtyń jumysy boiynsha usynys berýimiz kerek», - dep túsindirdi vedomstvo basshysy.
Onyń sózine qaraǵanda, atalmysh jumystyń ishinde naryqtan tiimsiz deldardardy shyǵarý tetikteri de bar.
«Aktsizdiń qunyn kóterýge múmkindik bar ma degenge kelsek, bar, árine. Biraq bólshek saýdadaǵy janarmai baǵasyn qaita qaraǵaly jatqan joqpyz.
Buǵan deiin de talai aitqanmyn, biz baǵany retteý isinde ieliginde janarmai quiý stansasy, munai bazasy siiaqty infraqurylymy joq deldaldardy naryqtan shyǵaramyz. Osynyń arqasynda qalǵan oiynshylardyń bárinde marja bolady. Shekti baǵa ózgermeidi. Deldaldyqpen aqsha taýyp júrgen adamdar ketedi de, baǵany qazirgidei shektegenniń ózinde tabys artylady. Mine osy artylǵan aqsha janarmai quiý stansalary men munai bazasy bar óńirlik operatorlardyń, sol munai ónimderin taratyp otyrǵan shikizat ieleriniń arasynda bóliske túsedi», - dedi ministr.
