ورتالىق كوممۋنيكاتسييالار قىزمەتٸندە ٶتكەن بريفينگٸدە قر ەنەرگەتيكا مينيسترٸ بولات اقشولاقوۆ بەنزين مەن ديزەلدٸڭ اكتسيزدٸك قۇنى ٶزگەرۋٸ مٷمكٸن ەكەنٸن راستادى. ايتۋىنشا, بۇل جانارمايدىڭ 180 كٷندٸك شەكتٸ باعاسىنا ەسەر ەتپەيدٸ, دەپ حابارلايدى قازاقپارات.
«مەن بريفينگتٸڭ باسىندا بەنزيننٸڭ بٷكٸل ماركاسىنا جەنە ديزەل وتىنىنا ناقتى باعا بەلگٸلەگەنٸمٸزدٸ ايتتىم. سەيكەسٸنشە, اكتسيزدەر قىمباتتاعاننىڭ ٶزٸندە ول وسى بەلگٸلەنگەن باعانىڭ ٸشٸندە بولۋى كەرەك دەپ ۇسىنىپ وتىرمىز. ياعني, اكتسيزدٸڭ قىمباتتاۋى جانارمايدىڭ بٶلشەك ساۋداداعى اقىرعى باعاسىن قىمباتتاتپاۋى كەرەك. بۇل جانارماي نارىعىنداعى ويىنشىلاردىڭ مارجاسىن قاتاي قاراۋ ەسەبٸنەن جٷرەدٸ. قازٸر بٸز وسى ەرەجەلەر بويىنشا جۇمىس جٷرگٸزٸپ جاتىرمىز. مەجەلٸ 180 كٷننٸڭ ٸشٸندە نارىقتىڭ جۇمىسى بويىنشا ۇسىنىس بەرۋٸمٸز كەرەك», - دەپ تٷسٸندٸردٸ ۆەدومستۆو باسشىسى.
ونىڭ سٶزٸنە قاراعاندا, اتالمىش جۇمىستىڭ ٸشٸندە نارىقتان تيٸمسٸز دەلدارداردى شىعارۋ تەتٸكتەرٸ دە بار.
«اكتسيزدٸڭ قۇنىن كٶتەرۋگە مٷمكٸندٸك بار ما دەگەنگە كەلسەك, بار, ەرينە. بٸراق بٶلشەك ساۋداداعى جانارماي باعاسىن قايتا قاراعالى جاتقان جوقپىز.
بۇعان دەيٸن دە تالاي ايتقانمىن, بٸز باعانى رەتتەۋ ٸسٸندە يەلٸگٸندە جانارماي قۇيۋ ستانساسى, مۇناي بازاسى سيياقتى ينفراقۇرىلىمى جوق دەلدالداردى نارىقتان شىعارامىز. وسىنىڭ ارقاسىندا قالعان ويىنشىلاردىڭ بەرٸندە مارجا بولادى. شەكتٸ باعا ٶزگەرمەيدٸ. دەلدالدىقپەن اقشا تاۋىپ جٷرگەن ادامدار كەتەدٸ دە, باعانى قازٸرگٸدەي شەكتەگەننٸڭ ٶزٸندە تابىس ارتىلادى. مٸنە وسى ارتىلعان اقشا جانارماي قۇيۋ ستانسالارى مەن مۇناي بازاسى بار ٶڭٸرلٸك وپەراتورلاردىڭ, سول مۇناي ٶنٸمدەرٸن تاراتىپ وتىرعان شيكٸزات يەلەرٸنٸڭ اراسىندا بٶلٸسكە تٷسەدٸ», - دەدٸ مينيستر.
