Tájikstan prezidenti Emomali Rahmon 26 qańtar kúngi parlamentke joldaýynda memleket koronavirýsty jeńe aldy, elde virýs joq dep málimdedi. Degenmen kóptegen táýelsiz sarapshylar resmi biliktiń koronavirýs týraly málimetine kúmánmen qaraidy.
Rahmon seisenbi kúni parlamentke joldaýynda 1 qańtardan beri elde koronavirýs juqtyrǵan birde-bir naýqas tirkelmegenin atap ótken. Alaida bul "turǵyndar sanitariia-gigiena erejelerin saqtamasa bolady" degendi bildirmeidi dep eskertken. Ol shetelden kelgenderdi karantinge jiberý qajettigin aitqan.
Azattyqtyń Tájik qyzmetiniń habarlaýynsha, elde 10 qańtardan beri resmi túrde koronavirýs juqtyrǵan naýqas tirkelmegen. Densaýlyq saqtaý ministrliginiń málimetinshe, koronavirýs indeti kezinde elde 13 308 adamǵa koronavirýs juqqan, 90 adam qaitys bolǵan.
Alaida sarapshylar resmi statistikaǵa kúmánmen qaraidy. Olar elde koronavirýs juqtyrǵandar sany resmi málimetten áldeqaida kóp dep sanaidy.
Tájikstanda alǵash ret koronavirýs byltyr 30 sáýirde anyqtalǵan. 2 mamyrda birinshi adam ólimi tirkeldi. Budan soń elde birqatar shekteý sharalary kúshine engen. Azattyqtyń Tájik qyzmeti Ortalyq Aziiada virýs kúsheiip turǵan shaqta biliktiń qoǵamdyq kólik pen bazarlarda sanitarlyq talaptardyń jii saqtalmaitynyna nazar aýdarmaitynyn jazady.
