Elordalyq qalalyq orta sapasy jáne baqylaý basqarmasy basshysynyń orynbasary Dáýlet Dosqulov «Orbita» turǵyn úi kesheninde turý qanshalyqty qaýipsiz ekenin aityp berdi, dep habarlaidy QazAqparat.
«Jalpy alǵanda bul nysanda turýǵa bolady. Adamdar 6 jyldan beri turyp jatyr. Olardy evakýatsiialaýdyń qajeti joq. Ondaǵy eń qaýipti nárse – úidiń qasbeti. Keramogranitten jasalǵan plitalar jelden ushyp, qulaýy múmkin. Sondyqtan, tehnikalyq tekserý jumystaryn tezdetip, qasbetin aýystyrýdy kózdep otyrmyz. Turǵyn úi barlyq kommýnaldyq qyzmetterge jalǵanǵan, jylý, jaryq, káriz, sý – barlyǵy jumys istep tur», - dedi D. Dosqulov qalalyq ákimdikte bergen suhbatynda.
Sonymen birge, «Orbita» TK qos munarasynan 4 jáne 6 qabat bóligin alyp tastaý týraly sot sheshimi shyqqan.
«Sot sheshimin biz oryndamaimyz, bul – sot oryndaýshylarynyń mindeti. Úi eshkimniń menshiginde joq. Turǵyndardy zańsyz ornalastyrǵany úshin úi salýshylarǵa ákimshilik sharalar qoldanylǵan. Tipti qylmystyq is qozǵalyp, uiym basshylary abaqtyǵa qamaldy», - dedi Dáýlet Dosqulov.
Eske sala ketsek, «Orbita» turǵyn úi kesheni páterlerdiń birinde balkon ornynan «jyljyp» ketip, eden dirildegen. Qalalyq ákimdiktiń habarlaýynsha, olar problemaly turǵyn úi týraly biledi. Qazirgi ýaqytta ol jaqta tehnikalyq tekserý júrgizilip jatyr, odan keiin úidiń apattyq deńgeii anyqtalady.
Ákimdiktiń habarlaýynsha, úi paidalanýǵa berilmese de, úi salýshylar 6 jyl buryn turǵyndardy zańsyz ornalastyrǵan. Ondaǵy eń qaýipti nárse – úidiń qasbeti jáne turǵyndardy evakýatsiialaýdyń qajeti joq.
