Elorda politseileri túngi ýaqytta mas júrgizýshini qýyp júrip ustady, dep habarlaidy QazAqparat Polisia.kz saityna silteme jasap.
7 sáýir kúni saǵat 03:52-de politsiia qyzmetkerleri Táýelsizdik dańǵyly boiymen kele jatyp, jol qozǵalysy erejesin óreskel buzǵan Citroën kóligin baiqady. Kólikte memlekettik tirkeý nómiri de bolmaǵan.
Politseiler kólikti toqtatpaq boldy. Alaida júrgizýshi toqtaýdyń ornyna, kerisinshe jyldamdyqty qosty. Osydan soń patrýldik politsiia jasaqtary kólikti qýa jónelgen.
Júrgizýshi politsiia qyzmetkerleriniń kólikti toqtatý týraly zańdy talabyn oryndamai, qashyp otyryp Kóktal shaǵynaýdanyna qarai buryldy. Patrýldikter kólikti Tilendiev dańǵylynda ony qorshap alady, alaida júrgizýshi zańsyz áreketin toqtatpai, politsiia kóligine qarsy qozǵaldy.
Jol qozǵalysynyń basqa qatysýshylaryna qaýip tóndirmeý úshin politsiia qyzmetkerleri qyzmettik qarý qoldanyp, kólik dóńgelekterin jaryp toqtatqan. Qarý qoldanýdan eshkim zardap shekken joq.
Kólik júrgizgen 21 jastaǵy er adam qamaýǵa alyndy. Saraptama qorytyndysy onyń mas kúiinde bolǵanyn kórsetti. Tekserý barysynda kólikten reseilik memlekettik tirkeý nómiri tabyldy. Jas er adamnyń buǵan deiin ákimshilik jaýapkershilikke tartylǵany anyqtaldy. Tártip buzýshyǵa qatysty birden 19 ákimshilik hattama toltyryldy.
Kólik aiyppul turaǵyna qoiyldy. Mamandandyrylǵan aýdanaralyq ákimshilik sotynyń qaýlysymen tártip buzýshy 20 táýlikke qamaýǵa alyndy, sonymen qatar 7 jylǵa kólik júrgizý quqyǵynan aiyryldy.
