ەلوردا پوليتسەيلەرٸ تٷنگٸ ۋاقىتتا ماس جٷرگٸزۋشٸنٸ قۋىپ جٷرٸپ ۇستادى, دەپ حابارلايدى قازاقپارات Polisia.kz سايتىنا سٸلتەمە جاساپ.
7 سەۋٸر كٷنٸ ساعات 03:52-دە پوليتسييا قىزمەتكەرلەرٸ تەۋەلسٸزدٸك داڭعىلى بويىمەن كەلە جاتىپ, جول قوزعالىسى ەرەجەسٸن ٶرەسكەل بۇزعان Citroën كٶلٸگٸن بايقادى. كٶلٸكتە مەملەكەتتٸك تٸركەۋ نٶمٸرٸ دە بولماعان.
پوليتسەيلەر كٶلٸكتٸ توقتاتپاق بولدى. الايدا جٷرگٸزۋشٸ توقتاۋدىڭ ورنىنا, كەرٸسٸنشە جىلدامدىقتى قوستى. وسىدان سوڭ پاترۋلدٸك پوليتسييا جاساقتارى كٶلٸكتٸ قۋا جٶنەلگەن.
جٷرگٸزۋشٸ پوليتسييا قىزمەتكەرلەرٸنٸڭ كٶلٸكتٸ توقتاتۋ تۋرالى زاڭدى تالابىن ورىنداماي, قاشىپ وتىرىپ كٶكتال شاعىناۋدانىنا قاراي بۇرىلدى. پاترۋلدٸكتەر كٶلٸكتٸ تٸلەنديەۆ داڭعىلىندا ونى قورشاپ الادى, الايدا جٷرگٸزۋشٸ زاڭسىز ەرەكەتٸن توقتاتپاي, پوليتسييا كٶلٸگٸنە قارسى قوزعالدى.
جول قوزعالىسىنىڭ باسقا قاتىسۋشىلارىنا قاۋٸپ تٶندٸرمەۋ ٷشٸن پوليتسييا قىزمەتكەرلەرٸ قىزمەتتٸك قارۋ قولدانىپ, كٶلٸك دٶڭگەلەكتەرٸن جارىپ توقتاتقان. قارۋ قولدانۋدان ەشكٸم زارداپ شەككەن جوق.
كٶلٸك جٷرگٸزگەن 21 جاستاعى ەر ادام قاماۋعا الىندى. ساراپتاما قورىتىندىسى ونىڭ ماس كٷيٸندە بولعانىن كٶرسەتتٸ. تەكسەرۋ بارىسىندا كٶلٸكتەن رەسەيلٸك مەملەكەتتٸك تٸركەۋ نٶمٸرٸ تابىلدى. جاس ەر ادامنىڭ بۇعان دەيٸن ەكٸمشٸلٸك جاۋاپكەرشٸلٸككە تارتىلعانى انىقتالدى. تەرتٸپ بۇزۋشىعا قاتىستى بٸردەن 19 ەكٸمشٸلٸك حاتتاما تولتىرىلدى.
كٶلٸك ايىپپۇل تۇراعىنا قويىلدى. مامانداندىرىلعان اۋدانارالىق ەكٸمشٸلٸك سوتىنىڭ قاۋلىسىمەن تەرتٸپ بۇزۋشى 20 تەۋلٸككە قاماۋعا الىندى, سونىمەن قاتار 7 جىلعا كٶلٸك جٷرگٸزۋ قۇقىعىنان ايىرىلدى.
