Búgin elordadaǵy Ulttyq akademiialyq kitaphanada Ahmet Kenesarinnyń qazaq tilindegi «Nasab name sultan Sydyq» kitabynyń tusaýkeseri ótti, dep habarlaidy QazAqparat.
Belgili aqyn Erbol Alshynbai qazaq tarihy úshin asa qundy eńbek sultan Ahmet Kenesarinnyń «Nasab name sultan Sydyq» kitabyn shaǵataishadan qazaqshaǵa aýdaryp, ǵylymi túsiniktemelerin jazyp, kitaptaǵy derekke sai Kenesary han men sultan Sydyqtyń joryq joldarynyń kartasyn saldyryp baspadan shyǵardy. Alǵy sózin Berik Ýáli, retsenziiasyn Jambyl Artyqbaev jazdy.
Atap aitqanda, kitap shaǵataishadan qazaqshaǵa tuńǵysh aýdarylyp otyr. Kenesary han men onyń áýleti, uly sultan Sydyq týraly kóptegen ǵylym úshin jańalyq bolatyn derekter ainalymǵa tústi. «Nasab name sultan Sydyq» ulttyq kózqaraspen jazylǵan, bizdiń halqymyzdyń múddesi turǵysynan paiymdalǵan tarihi eńbek.
«Jýyrda ǵana osy kitaptyń baspadan shyǵýyna sebepker bolǵan belgili aqyn, jas ǵalym Erbol Alshynbai baýyrymyz. Tikelei shaǵatai tilinen qazaqshaǵa tuńǵysh aýdaryp otyr. Memleket basshysy Qasym-Jomart Kemeluly aitqandai, «Árbir halyq óziniń arǵy-bergi tarihyn ózi jazýy kerek. Bóten ideologiianyń jeteginde júrýge bolmaidy. Ulttyq múdde turǵysynan jazylǵan shejire urpaqtyń sanasyn oiatyp, ulttyń jadyn jańǵyrtýǵa múmkindik beredi». Sol baǵytta osy kitapty shyǵarýǵa týraly keldi. Erbol Alshynbai QR Prezidenti baspasóz qyzmetinde sarapshy bolyp qyzmet atqarady. Pandemiia kezinde qashyqtan jumys isteý kezinde qosymsha osy kitapty aýdarýǵa tapsyrma berdik. Bul jigit osy tapsyrmany joǵary deńgeide oryndap shyqty desek bolady», - dedi QR Prezidentiniń baspasóz hatshysy Berik Ýáli.
Óz kezeginde Erbol Alshynbai bul kitapty aýdarýdaǵy maqsat qazaq tildi aýditoriiany, kontentti sapaly ǵylymi ári tarihi eńbektermen toltyrýǵa negizdelgenin atap ótti.
«Osy kitap Kenesary hannyń jolyn jalǵastyryp, kóp jyldar boiy qolynan qarýyn tastamaǵan Sydyq sultannyń ómiri arqyly tarihi kezeńdi tanýǵa, qazaqty tanýǵa jáne sol kezeńdegi tarihi tulǵalardy tanýǵa septesedi dep oilaimyz. Bizdiń tarihymyz úshin óte qundy, sondai-aq osy kezge deiin kóp ainalysqa túspegen ǵylymi derekter bar», - dedi E. Alshynbai.
Aita keteiik, atalǵan kitap «Altyn Qyran Foundation» qoǵamdyq qorynyń demeýshiligimen «Foliant» baspasynan 2 myń danamen jaryqqa shyqty. Tusaýkeser rásimine ziialy qaýym ókilderi, tarihshylar, jazýshylar qatysty.
