Foto: Polisia.kz
Astanalyq politseiler birneshe jyl boiy turǵyndy qorqytyp, 33 mln teńgege jýyq qarjyny iemdengen bopsalaýshylardy ustady, – dep habarlaidy "Ult aqparat" Polisia.kz portalyna silteme jasap.
31 jáne 46 jastaǵy eki er adam elorda turǵynynan birneshe jyl boiy aqshany qorqytyp alǵan. Olar er azamatty 2019 jyldan bastap psihologiialyq qysym kórsetý jáne intimdik sipattaǵy fotosýretter men beinejazbalardy taratamyz dep qorqytý arqyly bopsalaǵan.
Astana turǵyny birneshe jyl ishinde bopsalaýshylarǵa jalpy somasy 33 mln teńgege jýyq aqsha bergen. Kúdiktilerdiń biriniń talabyn oryndaý úshin jábirlenýshi óziniń Toyota Land Cruiser Prado avtokóligin lombardqa tapsyryp, 10 mln teńge bergen.
Er adam osy jyldyń qarasha aiynda, 46 jastaǵy kúdiktiniń kezekti bopsalaý faktisinen keiin politsiiaǵa júgingen.
"Jedel-izdestirý is-sharalary barysynda uiymdasqan qylmysqa qarsy kúres basqarmasynyń qyzmetkerleri bopsalaýǵa qatysy bar eki er adamdy ustady jáne qamaýǵa aldy.
Kúdiktilerdiń biri Almaty qalasynda ustaldy. Jeke tekserý barysynda odan esirtki zaty oralǵan túiinshek tárkilendi. Ustalǵan adamnyń buryn osyǵan uqsas qylmys jasaǵany úshin sottalǵany anyqtaldy.
Qazirgi ýaqytta atalǵan fakti boiynsha QR QK-niń 194-baby (Qorqytyp alý) boiynsha sotqa deiingi tergeý amaldary júrgizilip jatyr" - delingen habarlamada.
Astana qalasynyń politsiia departamenti zańnamaǵa sáikes iri jáne asa iri mólsherde múlik alý maqsatynda jasalǵan qorqytyp alý 5 jyldan 15 jylǵa deiingi merzimge bas bostandyǵynan aiyrýǵa jazalanatynyn eskertedi.
