Nursultan Nazarbaev halyqaralyq áýejaiynda 10 mamyrdan bastap Ashyq qosymshasy arqyly jolaýshylarǵa ruqsat berý jobasy engizilýde, dep habarlaidy "Ult aqparat" halyqaralyq áýejaidyń baspasóz qyzmetine silteme jasap.
Jobany 12 mamyrdan bastap tolyqqandy iske qosý josparlanyp otyr. Mobildi qosymshany QR Densaýlyq saqtaý ministrliginiń jalpy bazasymen integratsiialaý arqyly jolaýshynyń qazirgi ýaqytta virýstyń tasymaldaýshysy ma, joq pa degen mártebesi aiqyndalady. Iaǵni jolaýshylar men áýe kompaniialary men áýejai qyzmetkerleriniń qaýipsizdigi úshin qabyldanyp jatqan sanitariialyq sharalarǵa (maska, termometriia, jeldetý jáne t.b.) qosymsha baqylaý qamtamasyz etiledi.
Termometriia (dene qyzýyn qashyqtan ólsheý) Covid-19 belgileriniń birin anyqtaýǵa kómektesedi (dene temperatýrasynyń joǵarylaýy), al Ashyq qosymshasy jolaýshylar men qyzmetkerlerge qosymsha qaýipsizdik kepili bolmaq.
Osyǵan bailanysty, barlyq jolaýshylardan áýejaiǵa kelgenge deiin aldyn ala qosymshany júktep alyp, óz mártebesin tekserý suralady. Terminal ǵimaratyna sary jáne qyzyl mártebeli jolaýshylarǵa kirýge ruqsat berilmeidi. Reiske jiberilmegen jaǵdaida, qarajatty qaitarý boiynsha suraqtardy áýe kompaniialary qarastyrady.
Esterińizge sala keteiik, 17 qańtardan bastap Qazaqstan Respýblikasynyń tsifrlyq damý, innovatsiia jáne aeroǵarysh ónerkásibi ministrligi jáne QR Densaýlyq saqtaý ministrligi tapsyrys bergen Ashyq mobildi qosymshasy shaǵyn jáne orta biznestiń jeke nysandaryna qoljetimdilikti qamtamasyz etti.
