Ulybritaniia patshaiymy Elizaveta II jeksenbi, 5 sáýirde keshke koronavirýs indetine bailanysty halyqqa úndeý joldady. Málimdeme Vindzor saraiynda jazyldy. Epidemiia bastalǵan ýaqyttan beri 93 jastaǵy patshaiym Londonnan sol jaqqa kóshirilgen.
Patshaiym qazir memlekettiń aýyr kezeńdi bastan keshirip jatqanyn aitty.
"Keibir adamǵa qaiǵy ákeldi, kóbi qarjylyq qiyndyqqa tap boldy, kúndelikti ómirimiz úlken ózgeriske ushyrady" dedi.
Patshaiym britan azamattaryn yntymaq, birlikke shaqyryp, halyqtyń synaqtan aman-esen ótetinine úmittenetinin jetkizdi. Epidemiia kezinde zardap shekkenderge kómektesip jatqan dárigerlerge alǵys aitty.
68 jylǵa jýyq ýaqyt ishinde patshaiym besinshi ret úndeý joldap otyr. Sońǵy ret 2012 jyly taqta otyrǵanyna 60 jyl tolýyna orai málimdeme jasaǵan.
Ulybritaniiada sońǵy derek boiynsha, 45 myńnan astam adamǵa koronavirýs juqqan. Bes myńǵa jýyq adam qaitys bolǵan. Britan taǵynyń murageri hanzada Charlz dertten aiyqty. Koronavirýs premer-ministr Boris Djonsonnan da tabylǵan. Demalys kúni BBC saity onyń aýrýhanaǵa jetkizilgenin habarlady.
Eýropanyń basym bóligi siiaqty Ulybritaniiada da koronavirýsqa bailanysty karantin kesh engizilgen. 70 jastan asqan adamdarǵa 12 apta úiden shyqpaýǵa keńes berildi.
