QR Mádeniet jáne sport ministrligi Týrizm indýstriiasy komitetiniń tóraǵasy Dastan Rysbekov Qazaqstandaǵy barlyq kýrorttyq oryndarda osy jyldyń jazǵy týristik maýsymynyń sońyna deiin bos oryndar qalmaǵanyn málim etti, dep habarlaidy QazAqparat.
«Elimiz tótenshe jaǵdaidan shyqqannan keiin týristik biznes salasynda bizdiń ministrlik Densaýlyq saqtaý ministrligimen birlesip, qyzmet kórsetýshiler men demalýshylardyń sanitarlyq-epidemiologiialyq qaýipsizdigin qamtamasyz ete otyryp, karantindik shekteýler jaǵdaiynda kýrorttar, demalys aimaqtary men shipaeailar jumysynyń algoritmin jedel ázirledi. Atalǵan algoritmder ornalasý oryndarynyń barlyq menshik ielerine jetkizildi. Aita keterligi, biznes bul máselege jaýapkershilikpen qarap, týristik maýsymnyń bastalýyna daiyndalý, qorǵanys quraldaryn satyp alý, nysandardaǵy qaýipsizdikti qamtamasyz etý boiynsha barlyq talapty saqtai otyryp, jumysty uiymdastyrdy», - dedi Dastan Rysbekov OKQ-da ótken baspasóz máslihatynda.
Onyń aitýynsha, qalalar men oblystardyń ákimdikterinde týristik nysandardy qabyldanǵan algoritmderge sáikestigin tekseretin turaqty monitoring toptary qurylǵan.
«Osylaisha ishki týrizm salasynda jumys isteýge jáne klientter aldyndaǵy óz mindettemelerin oryndaýǵa múmkindik berildi. Bizdiń málimetterimiz boiynsha barlyq kýrorttyq orynda osy jyldyń jazǵy týristik maýsymynyń sońyna deiin brondaý úshin bos oryndar qalǵan joq», - dedi ol.
