2001 jyldan beri sybailas jemqorlyq qylmysy boiynsha 10 myńnan astam adam sottaldy, dep habarlady QR Memlekettik qyzmet isteri jáne sybailas jemqorlyqqa qarsy is-qimyl agenttiginiń tóraǵasy Alik Shpekbaev.
"Sybailas jemqorlyq faktileri boiynsha sottalǵandardyń 70 paiyzy atqarýshy bilik organdarynda qyzmet etken. 2001 jyldan engizilgen sybailas jemqorlyq qylmysy boiynsha resmi statistika osy jyldarda atalǵan fakti boiynsha 10 myńnan astam adamnyń sottalǵanyn kórsetip otyr. Osy ýaqytta jemqorlyq qylmystardan kelgen materialdyq shyǵyn 240 milliard teńgeden asty. Onyń 44 paiyzy qaitaryldy. Bul jemqorlyqqa qarsy kúres qyzmetiniń tiimdiligi men azamattyq qoǵamnyń qoldaýy artqanynyń nátijesi", — dedi Shpekbaev búgin úkimet otyrysynda.
Ortalyq atqarýshy organdardyń ishinde sottalǵandardyń sany boiynsha Ishki ister, Qarjy, Ádilet, Qorǵanys, Aýyl sharýashylyǵy ministrlikteri kósh basynda tur.
"2016 jyly ishki ister organdarynyń qyzmetkerlerine qatysty tirkelgen 398 faktiniń elý paiyzǵa jýyǵy jergilikti politsiia qyzmetimen bailanysty. Osy salada jemqorlyqpen kúres boiynsha jospar ázirlep, iske asyratyn qajettilik týyndap otyr", — dedi ol.
Agenttik tóraǵasynyń málimetinshe, Qarjy ministrliginde sottalǵandardyń 86 paiyzy — kedendik, salyq, sondai-aq, ekonomikalyq tergeý qyzmetiniń qyzmetkerleri. Al jergilikti atqarýshy organdar ishinde bilim berý uiymdary, ákimderdiń apparaty, qurylys, turǵyn úi-kommýnaldyq, mádeniet jáne tilderdi damytý salalary eń jemqor bolyp otyr.
Óńirler arasynda reitingti Shyǵys Qazaqstan, Ońtústik Qazaqstan, Qaraǵandy jáne Jambyl oblystary bastaidy.
