«Jańa jaǵdaidaǵy jastar: is-qimyl kezeńi» respýblikalyq onlain jastar jobasy aiasynda elimizdiń eń tanymal 25 sarapshysy jastarǵa onlain bilim beredi. Bul týraly QR Aqparat jáne qoǵamdyq damý ministrliginiń jastar jáne otbasy isteri komitetiniń tóraǵasy Shahmardan Baimanov málim etti, dep habarlaidy QazAqparat.
«Jańa jaǵdaidaǵy jastar: is-qimyl kezeńi» respýblikalyq onlain jastar jobasynyń eń mańyzdy baǵytynyń biri – onlain bilim. Elimizdegi eń úzdik degen 25 spiker (sarapshylar men koých-trenerler) jastarǵa bilim beredi. Bul jerde bes baǵytty tańdap otyrmyz. Atap aitqanda «tulǵalyq taný», «volonterlik qyzmet», «azamattyq belsendilik», «aqparattyq tehnologiialar» men «jastar belsendiligi» baǵyttary tańdap alyndy. Bul taqyryptardy jaidan-jai alǵan joqpyz. Bul - jastardyń talǵamyna, qazirgi trendterge negizdelgen taqyryptar, osy daǵdylardy bizdiń úzdik koých-trenerler oqytady», - dedi Shahmardan Baimanov OKQ-da ótken baspasóz máslihatynda.
Komitet basshysynyń aitýynsha, koých-trenerler ár baǵyt boiynsha 200 qatysýshyny oqytady.
«Sonymen qatar, ashyq pikir formatynda onlain dialog qurǵymyz keledi. Oǵan laýazymdy tulǵalar men belgili qoǵam qairatkerlerin shaqyrý josparlanǵan. Onlain dialog tok-shoý formatynda uiymdastyrylady. Jastardy qatty mazalap júrgen bes taqyryp tańdap alyndy. Bul jerde turǵyn úi, bilim, jumyspen qamtý, aqparattyq tehnologiialar, belsendilikti shyńdaý sekildi taqyryptar bar. Osy salanyń mamandary óz oi-pikirin usynady», - dedi ol.
