Búgin Qazaqstan halqy Assambleiasy janyndaǵy 1774 Analar keńesi rýhani jańǵyrý aiasynda Ońtústik Qazaqstan oblysynda bas qosty, dep habarlaidy "Ult aqparat".
Shymkent qalasyndaǵy Qazaqstan injenerli-pedagogikalyq Halyqtar dostyǵy ýniversitetinde jinalǵan analar «Rýhani jańǵyrý» baǵdarlamalyq maqalasyn iske asyrýdaǵy Analar keńesiniń rólin talqylady. Jiynǵa Qazaqstan halqy Assambleiasy tóraǵasynyń orynbasary, hatshylyq meńgerýshisi Darhan Myńbai, Ońtústik Qazaqstan oblysynyń ákimi Janseiit Túimebaev, QR Bas prokýratýrasy men QHA qyzmetkerleri, ǵalymdar, respýblikalyq qoǵamdyq uiymdardyń jetekshileri, barlyq oblystardaǵy Analar keńesteriniń tóraiymdary qatysty.
Bas qosýda sóz alǵan oblys ákimi J.Túimebaev jer júzindegi barlyq halyqtyń óz aldyna ult bolyp uiysýyna, jeke halyq, egemen el, derbes memleket bolyp qalyptasýyna áiel-analardyń sińirgen eńbegi orasan ekenin aitty.
«Búginde bizdiń qoǵamdaǵy analarymyz elimizde bolyp jatqan barlyq jaǵymdy jańalyqtarǵa, qoǵamdaǵy ómirsheń ózgeristerge, ideialyq-saiasi, áleýmettik-mádeni jumystarǵa, memleketimizdiń búkil tynys-tirshiligine belsene aralasyp otyr. Statistikalyq málimetterge súiensek, bizdegi jalpy memlekettik qyzmetshilerdiń teń jartysynan astamy áielderdiń úlesine tiedi eken. Bul – úlken kórsetkish, joǵary nátije, jaqsylyqtyń nyshany. Qazaqstan halqy Assambleiasy janynan Analar keńesin qurý eldigimizge tán, tarihi dástúrimizben tamyrlas bastama bolyp tabylady. Óitkeni, ananyń aq batasymen eldiń kósegesi kógergen, onyń bir aýyz sózimen el ishin alataidai búldirgen nebir ónbes daýlarǵa núkte qoiylǵan», - dedi ákim.
Respýblikalyq otyrysta Memleket basshysynyń «Bolashaqqa baǵdar: rýhani jańǵyrý» baǵdarlamalyq maqalasynda aitylǵandai, ulttyq dástúrdi negizge ala otyryp, otbasy qundylyqtaryn dáripteý, urpaq tárbiesindegi ózekti máselelerdi talqylap, usynystar ázirleý, urpaqtan urpaqqa jalǵasyp kele jatqan ózara syilastyq pen tatýlyq, meiirimdilik, birlik pen kelisim sekildi eldigimizdiń tiregi bolǵan qundylyqtardy keńinen nasihattaý jaiy qaraldy.
Aita ketý kerek, búginde Qazaqstan halqy Assambleiasy janynda konsýltativtik-keńesshi organ retinde oblystyq, aýdandyq, aýyldyq deńgeide 1774 Anar keńesi jumys isteýde. Keńeste 9234 adam múshe bolyp tabylady. Al, Ońtústik Qazaqstan oblystyq Qazaqstan halqy Assambleiasy janynda 202 Analar keńesteri bar. 1130-dan astam múshesi bar keńes ajyrasýdyń aldyn alý, otbasydaǵy urpaq tárbiesi, jasóspirimder arasyndaǵy qylmys pen quqyqbuzýshylyq syndy ózekti máseleler tóńireginde 640-tan astam is-shara uiymdastyryp, birqatar aýqymdy bastamalardy qolǵa aldy.
