Qazaqstanda mektepterdiń 99 paiyzy beinebaqylaý júiesimen jabdyqtalǵan. Bul týraly QR Bilim jáne ǵylym ministrligi Bilim jáne ǵylym salasyndaǵy baqylaý komitetiniń basshysy Gúlzat Kóbenova aitty, dep habarlaidy QazAqparat.
«Aýmaqtyq departamentter mektepke deiingi jáne orta bilim berý uiymdarynyń beinebaqylaý júiesimen jáne sanitarlyq-gigienalyq toraptarmen qamtamasyz etilýine monitoring jumysyn júrgizdi. Memleket basshysy orta jáne mektepke deiingi bilim berýdiń barlyq uiymdaryn beinebaqylaýmen júiesimen jabdyqtaý týraly tapsyrma bergen bolatyn. Monitoringpen 7 127 mektepke deiingi bilim berý uiymy qamtyldy. Nátijesinde búgingi kúni olardyń 20-synda beinebaqylaý júiesiniń joq ekendigi anyqtaldy. Túrkistan, Almaty oblystaryndaǵy, Shymkent, Almaty, Nur-Sultan qalalaryndaǵy jekemenshik mektepke deiingi uiymdardyń 507-sinde beinebaqylaý júiesi bolmai shyqty», - dedi ol ministrliktiń apparat keńesinde.
Onyń aitýynsha, elimizde 6 971 memlekettik mektep beinebaqylaý júiesimen qamtamasyz etilgen. Al 72 mektepte mundai júie áli kúnge ornatylmaǵan.
«Is júzinde búginde beinebaqylaý júiesimen jabdyqtalǵan bilim berý uiymdarynyń úlesi 2018 jylǵy 75 paiyzdan 99 paiyzǵa deiin jetti. Degenmen, Ulttyq bilim berý derekter qory (UBBDQ) málimettermen sáikessizdikterge nazar aýdartqym keledi. UBBDQ orta bilim berýdiń nebári 6 uiymynda ǵana beinebaqylaý júiesiniń joq ekendigin kórsetken. Bul oraida Túrkistan, Soltústik Qazaqstan, Batys Qazaqstan jáne Almaty oblystary óz kórsetkshterin durys kórsetpegen», - dedi Gúlzat Kóbenova.
Sonymen qatar komitet basshysynyń aitýynsha, elimizdegi jekemenshik mektepter tolyqtai beinebaqylaý júiesimen qamtamasyz etilgen. Degenmen Almaty men Batys Qazaqstan oblystary olardyń talapqa sai kelýine nazar aýdarýlary qajet.
