Qazaqstanda salyq deklaratsiialarynyń 99 jáne kedendik deklaratsiialardyń 100 paiyzy qashyqtan tapsyrylady. Bul týraly búgin Úkimet otyrysynda QR Qarjy ministri Erulan Jamaýbaev aitty, dep habarlaidy QazAqparat.
«Búgingi kúni jeke jáne zańdy tulǵalarǵa 44 memlekettik qyzmet kórsetiledi, onyń ishinde 38-i - elektrondy túrde. Ótken jyly 22,3 mln memlekettik qyzmet kórsetildi, onyń 97 paiyzy - elektrondy túrde. Memlekettik kirister komitetiniń Bailanys ortalyǵy 2020 jyly 670 myńnan astam salyq tóleýshilerdiń ótinishin óńdedi. Olardyń 91 paiyzy operatorlardyń jumysyn «óte jaqsy» dep baǵalady», - dedi Erulan Jamaýbaev.
Onyń aitýynsha, adamdar kóbinese jergilikti salyqtardy tóleý, salyq beresheginiń somalary, eseptilikterdi toltyrý jáne taǵy basqa máseleler boiynsha júginedi.
«Engizilgen tsifrlyq tehnologiialarǵa keletin bolsaq. 2019 jyly biz Astana-1, Elektrondyq shot-faktýralar, Táýekelderdi basqarý júiesi aqparattyq júielerin engizdik. Búgingi kúni salyq deklaratsiialarynyń 99 jáne kedendik deklaratsiialardyń 100 paiyzy qashyqtan tapsyrylady. «Elektrondyq shot-faktýralar» júiesin engizý kontragentter arasyndaǵy mámilelerdi onlain rejimde qadaǵalaýǵa múmkindik berdi», - dedi ministr.
