Qazaqstan rieltorlarynyń birikken qaýymdastyǵynyń prezidenti Larisa Stepanenko úi baǵasyna qatysty óz oiyn aityp, kópshiliktiń san saýalyna jaýap berdi, dep habarlaidy QazAqparat.
Keiingi bir jylda elimizdiń turǵyn úi naryǵyn buryn-sońdy bolmaǵan qymbatshylyq jailady. Zeinetaqy qoryndaǵy qarjyny paidalaný quqyǵy berilgen boida, baǵa birden 10-12 paiyzǵa ósti.
Kóptegen otandastarymyz úidiń baǵasy ýshyǵyp turǵanyn aitady.
Jaqynda ǵana baspana satyp alǵan almatylyq turǵyn páter baǵasy sharyqtap ketkenin tilge tiek etti.
«Men osydan 15 kún buryn Almatynyń ortalyǵynan eki bólmeli páter satyp aldym. Úi qoldanysqa 1970 jyly berilgen. Iaǵni, eski. Biraq, ol baspana baǵasyna esh áser etpedi. Jazda ol páterdiń baǵasy 17 mln teńge bolsa, qazir 25 mln teńgege jetti. Iesimen saýdalasyp jatyp, qolma-qol aqshaǵa 23 mln teńgege satyp aldym. Almatyda páter baǵasy sharyqtap tur», - deidi Altyn Bazarqulova.
Qazaqstannyń Birikken rieltorlar qaýymdastyǵynyń prezidenti Larisa Stepanenko úi baǵasyna qatysty óz oiyn aitty.
«Elde qańtar oqiǵasynan keiingi jaǵdai birtindep túzelip keledi. Adamdar qalypty ómirge qaita oraldy. Infliatsiiaǵa bailanysty páter baǵasy jyl saiyn orta eseppen 10%-ǵa qymbattap jatyr. Satýshylar baǵany shynymen kóterdi. Árbir satýshy baspanany meiilinshe qymbatqa ótkizgisi keledi, satyp alýshy kerisinshe arzanǵa izdeidi. Bul zańdy qubylys. Alaida suraǵan baǵaǵa sirek ótedi. Qazir zeinetaqy jinaǵynyń jetkilikti shegi artty. Sondyqtan baspana baǵasy arzandaidy», - deidi Larisa Stepanenko.
Spikerdiń sózinshe, qazir páterlerdiń qymbattaýyna aiqyn sebepter joq.
«Baspana baǵasyn kóterýge eshqandai sebep kórip turǵanym joq. Óitkeni suranys naryqtaǵy usynystan áldeqaida tómen. Jazǵa qarai, ádettegidei, elde halyqtyń belsendi kóshi-qony bastalady. Sol ýaqytta satylymǵa kóp baspana shyǵarylady. Alaida, bul baǵany negizsiz ósirýge ákelmeýi kerek. Sebebi, halyqtyń jalaqysy ósken joq. Jumys oryndarynda qysqartý júrip jatqanyn kórip otyrmyz. Memleket turǵyn úi satyp alý úshin banktik baǵdarlamalardy áli shyǵarǵan joq», - deidi ol.
Sonymen qatar, ol jazǵa qarai úi ieleri satylymǵa qoiǵan baspana baǵasyn túsiretinin atap ótti.
«Bizde baspana satýshylar kóp, satyp alýshylar áldeqaida az. Sondyqtan arzandaýy kerek. Úiin shynymen de satqysy keletinder, baǵasyn túsiredi», - dep qorytyndylady sózin Qazaqstannyń Birikken rieltorlar qaýymdastyǵynyń prezidenti Larisa Stepanenko.
