قازاقستان ريەلتورلارىنىڭ بٸرٸككەن قاۋىمداستىعىنىڭ پرەزيدەنتٸ لاريسا ستەپانەنكو ٷي باعاسىنا قاتىستى ٶز ويىن ايتىپ, كٶپشٸلٸكتٸڭ سان ساۋالىنا جاۋاپ بەردٸ, دەپ حابارلايدى قازاقپارات.
كەيٸنگٸ بٸر جىلدا ەلٸمٸزدٸڭ تۇرعىن ٷي نارىعىن بۇرىن-سوڭدى بولماعان قىمباتشىلىق جايلادى. زەينەتاقى قورىنداعى قارجىنى پايدالانۋ قۇقىعى بەرٸلگەن بويدا, باعا بٸردەن 10-12 پايىزعا ٶستٸ.
كٶپتەگەن وتانداستارىمىز ٷيدٸڭ باعاسى ۋشىعىپ تۇرعانىن ايتادى.
جاقىندا عانا باسپانا ساتىپ العان الماتىلىق تۇرعىن پەتەر باعاسى شارىقتاپ كەتكەنٸن تٸلگە تيەك ەتتٸ.
«مەن وسىدان 15 كٷن بۇرىن الماتىنىڭ ورتالىعىنان ەكٸ بٶلمەلٸ پەتەر ساتىپ الدىم. ٷي قولدانىسقا 1970 جىلى بەرٸلگەن. ياعني, ەسكٸ. بٸراق, ول باسپانا باعاسىنا ەش ەسەر ەتپەدٸ. جازدا ول پەتەردٸڭ باعاسى 17 ملن تەڭگە بولسا, قازٸر 25 ملن تەڭگەگە جەتتٸ. يەسٸمەن ساۋدالاسىپ جاتىپ, قولما-قول اقشاعا 23 ملن تەڭگەگە ساتىپ الدىم. الماتىدا پەتەر باعاسى شارىقتاپ تۇر», - دەيدٸ التىن بازارقۇلوۆا.
قازاقستاننىڭ بٸرٸككەن ريەلتورلار قاۋىمداستىعىنىڭ پرەزيدەنتٸ لاريسا ستەپانەنكو ٷي باعاسىنا قاتىستى ٶز ويىن ايتتى.
«ەلدە قاڭتار وقيعاسىنان كەيٸنگٸ جاعداي بٸرتٸندەپ تٷزەلٸپ كەلەدٸ. ادامدار قالىپتى ٶمٸرگە قايتا ورالدى. ينفلياتسيياعا بايلانىستى پەتەر باعاسى جىل سايىن ورتا ەسەپپەن 10%-عا قىمباتتاپ جاتىر. ساتۋشىلار باعانى شىنىمەن كٶتەردٸ. ەربٸر ساتۋشى باسپانانى مەيٸلٸنشە قىمباتقا ٶتكٸزگٸسٸ كەلەدٸ, ساتىپ الۋشى كەرٸسٸنشە ارزانعا ٸزدەيدٸ. بۇل زاڭدى قۇبىلىس. الايدا سۇراعان باعاعا سيرەك ٶتەدٸ. قازٸر زەينەتاقى جيناعىنىڭ جەتكٸلٸكتٸ شەگٸ ارتتى. سوندىقتان باسپانا باعاسى ارزاندايدى», - دەيدٸ لاريسا ستەپانەنكو.
سپيكەردٸڭ سٶزٸنشە, قازٸر پەتەرلەردٸڭ قىمباتتاۋىنا ايقىن سەبەپتەر جوق.
«باسپانا باعاسىن كٶتەرۋگە ەشقانداي سەبەپ كٶرٸپ تۇرعانىم جوق. ٶيتكەنٸ سۇرانىس نارىقتاعى ۇسىنىستان ەلدەقايدا تٶمەن. جازعا قاراي, ەدەتتەگٸدەي, ەلدە حالىقتىڭ بەلسەندٸ كٶشٸ-قونى باستالادى. سول ۋاقىتتا ساتىلىمعا كٶپ باسپانا شىعارىلادى. الايدا, بۇل باعانى نەگٸزسٸز ٶسٸرۋگە ەكەلمەۋٸ كەرەك. سەبەبٸ, حالىقتىڭ جالاقىسى ٶسكەن جوق. جۇمىس ورىندارىندا قىسقارتۋ جٷرٸپ جاتقانىن كٶرٸپ وتىرمىز. مەملەكەت تۇرعىن ٷي ساتىپ الۋ ٷشٸن بانكتٸك باعدارلامالاردى ەلٸ شىعارعان جوق», - دەيدٸ ول.
سونىمەن قاتار, ول جازعا قاراي ٷي يەلەرٸ ساتىلىمعا قويعان باسپانا باعاسىن تٷسٸرەتٸنٸن اتاپ ٶتتٸ.
«بٸزدە باسپانا ساتۋشىلار كٶپ, ساتىپ الۋشىلار ەلدەقايدا از. سوندىقتان ارزانداۋى كەرەك. ٷيٸن شىنىمەن دە ساتقىسى كەلەتٸندەر, باعاسىن تٷسٸرەدٸ», - دەپ قورىتىندىلادى سٶزٸن قازاقستاننىڭ بٸرٸككەن ريەلتورلار قاۋىمداستىعىنىڭ پرەزيدەنتٸ لاريسا ستەپانەنكو.
