Qazaqstanda 48 aýdandyq mańyzy bar qalanyń 13-ne aýyl mártebesi berilýi múmkin, dep habarlaidy QazAqparat.
«Zań jobasy Qazaqstannyń ákimshilik-aýmaqtyq qurylysy salasyndaǵy zańnamany jetildirýge baǵyttalǵan. Eldiń ákimshilik-aýmaqtyq birlikteriniń sanattary, jekelegen eldimekenderdiń atap aitqanda aýdandyq mańyzy bar qalalardyń qazirgi mártebesin tolyq kólemde kórsetpeidi. Búgingi tańda 48 aýdandyq mańyzy bar qalanyń 13-i halyq sany boiynsha qala mártebesine sáikes kelmeidi, sebebi qoldanystaǵy ákimshilik-aýmaqtyq qurylys týraly zańǵa sáikes aýdandyq mańyzy bar qalalarǵa halqynyń sany 10 myń adamnan kem emes eldimekender jatady», - dedi Májilis depýtaty Áliia Saparova Parlament Májilisinde «QR keibir zańnamalyq aktilerine óńirlerdiń ákimshilik-aýmaqtyq qurylysyn jetildirý máseleleri boiynsha ózgerister men tolyqtyrýlar engizý týraly» zań jobasyn oqi otyryp.
Depýtattyń aitýynsha, aýdandyq mańyzy bar qalalardaǵy turǵyndar sanynyń azaiýyna bailanysty olardyń mártebesin ózgertý qajettigi týyndaidy.
«Bul rette zańnamada aýdandyq mártebesi qalanyń mártebesin aýylǵa ózgertý jónindegi quqyqtyq tetik kózdelmegen. Osyǵan bailanysty depýtattar osy zańǵa aýdandyq mańyzy bar qalalardy ózge eldimekenderge qaita qurý jónindegi quzyretti aiqyndaýǵa baǵyttalǵan túzetýlerdi engizdi. Qala mártebesiniń aýylǵa ózgerýi – jergilikti turǵyndarǵa aýyldy eldimekenderdiń turǵyndary úshin qarastyrylǵan memlekettiń qoldaýdyń barlyq sharalaryn alýǵa múmkindik beretinin atap ótken jón», - dedi ol.
