Qazaqstanda 2006 jylǵy úlgidegi nominaly 2 000, 5 000 jáne 10 000 teńgelik banknottardy aýystyrý merzimi aiaqtaldy, dep habarlaidy «Ult aqparat».
Aita keteiik, 2006 jylǵy úlgidegi banknottardy aiyrbastaý 2020 jyldyń 21 jeltoqsanynan 2021 jyldyń 1 aqpanyna deiin uzartylǵan bolatyn.
«Osy nominaldardaǵy banknottardy aýystyrý merzimin uzartý týraly sheshimdi Ulttyq bank azamattardyń ótinishterine bailanysty qabyldaǵan bolatyn. Aiyrbastaý tek jeke tulǵalar úshin Ulttyq banktiń filialdarynda 2020 jyldyń 21 jeltoqsanynan bastap 2021 jyldyń 1 aqpanyna deiin júrgizildi. Osy kezeńde banknottardy aýystyrýǵa qatysty ótinishterdiń kóp bóligi Almaty qalasynyń (28,2%), Nur-Sultan qalasynyń (9,5%) jáne Qaraǵandy oblysynyń (7,5%) turǵyndarynan tústi. Aiyrbastaýǵa qabyldanǵan kýpiýralardyń negizgi úlesi nominaly 2 000 teńgelik (44,1% ) banknotaǵa tiesili boldy, odan keiin 5 000 (30,9%) jáne 10 000 teńgelik (25,0%) banknottar», - dep habarlady Ulttyq bankten.
Ulttyq valiýtanyń qoldanystaǵy aqsha belgilerine aýystyrý merziminiń aiaqtalýyna bailanysty 2006 jylǵy úlgidegi atalǵan nominaldaǵy banknottar Qazaqstan Respýblikasynyń búkil aýmaǵynda qabyldaýǵa jáne aiyrbastaýǵa jatpaidy jáne tólem quraly bolyp sanalmaidy.
