Elimizde 18 jasqa tolǵan 11 mln 730 myńnan astam azamat turǵylyqty jerinde tirkelgen. Bul týraly QR Ishki ister ministriniń birinshi orynbasary Marat Qojaev aitty, dep habarlaidy QazAqparat.
«Naqty sailaý ýchaskesine azamatty sailaýshylar tizilimine engizý úshin onyń osy sailaý ýchaskesiniń aýmaǵyndaǵy turǵylyqty jeri boiynsha tirkelý faktisi negiz bolyp sanalady. «Halyqtyń kóshi-qony týraly» zańnyń 51-babynda ishki kóship-qonýshylardyń turaqty jáne ýaqytsha turǵylyqty jeri boiynsha tirkelý mindeti kózdelgen. Osy mindetti saqtamaǵany úshin ákimshilik kodekstiń 492-babynda ákimshilik jaýapkershilik qarastyrylǵan. Ishki kóship-qonýshylardy tirkeý tártibi QR Úkimetiniń 2011 jylǵy №1427 qaýlysymen rettelgen. Qaǵidalarǵa sáikes, QR azamattary jańa turǵylyqty jerine nemese ýaqytsha turýǵa kelgen kúninen bastap kúntizbelik 10 kúnde tirkeledi. Búginde halyqty turǵylyqty jeri boiynsha tirkeý rásimi tolyǵymen avtomattandyrylǵan jáne elektrondyq-tsifrlyq qoltańbasy bolǵan kezde elektrondy úkimet portaly nemese mobildi úkimet qosymshasy arqyly, sonymen qatar Halyqqa qyzmet kórsetý ortalyqtaryna júgingen kezde rásimdeledi. Tirkeý 3-5 minýttan aspaityn ýaqytty alady», - dedi ol Ortalyq sailaý komissiiasynyń otyrysynda.
Onyń atap ótýinshe, turǵylyqty ne ýaqytsha turatyn jeri boiynsha tirkeý kezinde jańa meken jai týraly málimetter dereý IIM-niń aqparattyq júiesine engiziledi. Ol jerde onlain rejimde Ádilet ministrliginiń «Jeke tulǵalar» memlekettik derekqoryna engiziledi. Sonyń negizinde jergilikti atqarýshy organdar men OSK sailaýshylardyń tizilimin jasaidy.
«IIM málimetteri boiynsha osy jyldyń 26 qazanyndaǵy jaǵdaiǵa sáikes, elimizde 18 jasqa tolǵan 11 733 944 azamat tirkelgen. Onyń ishinde 11 099 923 turǵylyqty jeri boiynsha turaqty tirkelgen. 15 324 adam tek ýaqytsha tirkeýge alynǵan. 618 myńnan astam adam turǵylyqty jeri boiynsha tirkeýden shyǵarylǵan. Qazir ministrlik Ortalyq sailaý komissiiasymen birlesip, sailaýshylar tizimin ózektendirý boiynsha ózara is-qimyl algaritmderin pysyqtaýda. Soǵan sáikes, Parlament Májilisi depýtattaryn sailaýǵa daiyndyq boiynsha jumys jalǵasady», - dedi Marat Qojaev.
