Tanymal Sportskeeda.com sport portaly Qazaqstannyń jáne álemniń birinshi raketkasy Elena Rybakina men Belarýs ókili Arina Sobolenko arasyndaǵy US Open finalyna boljam jasady, dep habarlaidy ult.kz.
Sobolenko qazirgi US Open chempiony. Alaida final nátijesine qaramastan, AQSh ashyq chempionaty aiaqtalǵan soń ol álemdik reitingtegi birinshi orynynan aiyrylady. Bul oryn Elena Rybakinaǵa buiyrady.
Sportskeeda sarapshylarynyń málimetinshe, eki tennisshiniń ózara kezdesýinde Sobolenko 10:7 esebimen alda keledi. Al finaldyq kezdesýlerde 4:2 nátijesimen Rybakinanyń basym tur.
Biyl tennisshiler finalda bir-birin bir retten jeńgen. Sobolenko qazaqstandyq sportshyǵa qarsy úsh setke sozylǵan kezdesýlerde jaqsyraq óner kórsetip, on matchtyń segizinde jeńiske jetken.
Al Rybakina birinshi sette jeńiske jetken jaǵdaida qarsylasyn utýǵa múmkindigi joǵary. Eki sette aiaqtalǵan ózara kezdesýlerde qazaqstandyq tennisshiniń basymdyǵy 5:2.
Eki sportshy da sońǵy eki aptada joǵary deńgeide óner kórsetip keledi. Sobolenko US Open týrnirinde eń kóp vinner, iaǵni utqyr soqqy jasaǵan tennisshi bolsa, Rybakina eis sany boiynsha kósh bastap tur.
Rybakina qazirdiń ózinde Sobolenkodan álemdik reitingtegi birinshi oryndy tartyp aldy. Al Belarýs tennisshisi US Open-degi chempiondyq ataǵyn qorǵaýǵa bar kúshin salatyny anyq.
«Birneshe ai boiy sátsiz óner kórsetken Sobolenko dál kerek ýaqytta babyna qaita kelgen siiaqty. Al Rybakina sońǵy eki raýndta qiyn jaǵdailardan shyǵyp, qysym kezinde ózin jaqsy ustai alatynyn kórsetti. Bul matchtaǵy negizgi faktor dop shyǵarýdyń sapasynda bolady. Rybakina ózi bergen doptardaǵy geimderde turaqtyraq oinaidy. Bul oǵan mansabyndaǵy úshinshi «Úlken dýlyǵa» titýlyn jeńip alýǵa kómektesýi múmkin. Boljam: Elena Rybakina úsh sette jeńiske jetedi», dep jazylǵan materialda.
Eske salaiyq, US Open-2026 týrniriniń Elena Rybakina – Arina Sobolenko arasyndaǵy finaldyq báseke 12 qyrkúiekten 13-ne qaraǵan túni Qazaqstan ýaqyty boiynsha saǵat 01:00 bastalady.
