Qazaqstannyń birinshi, álemniń 22-raketkasy Elena Rybakina Parijde ótip jatqan Rolan Garros týrniriniń shirek finalyna shyqty, dep habarlaidy "Ult aqparat".
Jýyrda 22-ge tolatyn Rybakina tórtinshi ainalymda ataqty amerikalyq, «Úlken dýlyǵa» týrnirleriniń 23 dúrkin jeńimpazy, qazirgi kezde reitingte 8-satyda turǵan 39 jastaǵy Serena Ýiliamspen kortqa shyqty.
Bul - olardyń ózara alǵashqy kezdesýi edi. Buǵan deiin qazaqstandyq tennisshiler S.Ýiliamsti jeńip kórmegen.
Matchty qarqyndy bastaǵan qazaqstandyq tennisshi 4:1 esebimen alǵa ketti.
Budan keiin amerikalyq sportshy esepti qysqartqanymen, Rybakina qaiyra breik jasap, setke dop bergende, óz múmkindigin jibermedi – 6:3.
Ekinshi partiiany Elena breikpen bastaǵanymen, tájiribeli qarsylasy tarazy basyn teńestirip úlgerdi.
Esep 3:3 bolǵan mezette qazaqstandyq tennisshi breik jasap, qaita alǵa shyqty. Biraq óz geiminde qatelikke jol berdi – 4:4.
Degenmen esep 5:5 bolǵanda, taǵy bir breikke qol jetkizdi – 6:5. Sodan keiin birinshi matchbolyn paidalana bildi – 7:5.
Báseke 1 saǵat 18 minýtqa sozyldy.
Osylaisha qazaqstandyq tennisshi óz sporttyq jolynda alǵash ret Rolan Garros týrniriniń shirek finalyna ótti.
E.Rybakina jartylai finalǵa shyǵý úshin álemniń 32-raketkasy, reseilik Anastasiia Pavliýchenkovamen talasady. Ol tórtinshi ainalymda Belarýs ókili Viktoriia Azarenkony 5:7, 6:3, 6:2 esebimen utty.
Bir qyzyǵy, Rybakina Pavliýchenkovamen birge Frantsiia ashyq chempionatynda juptyq synda da tabysty óner kórsetýde, olar úshinshi ainalymǵa ótken bolatyn.
