Qazaqstandyq tennisshi Elena Rybakina WTA reitinginde resmi túrde álemniń birinshi raketkasy atandy, dep habarlaidy ult.kz.
Qazaqstan tennis federatsiiasynyń málimetinshe, reiting jańarǵannan keiin Rybakinanyń enshisinde 9 901 upai bar. Ol 7 875 upai jinaǵan Arina Sobolenkodan 2 026 upaiǵa ozyp, kósh bastady. Úzdik úshtikti 7 265 upaimen amerikalyq Djessika Pegýla túiindedi.
Álemdik reitingtegi birinshi oryn úshin kúreste US Open-2026 týrniri sheshýshi ról atqardy. Rybakina qytailyq Chjen Tsinvendi jeńip, jartylai finalǵa shyqqannan keiin, týrnirdiń qalǵan nátijesine qaramastan reiting kóshin qamtamasyz etti.
Alaida qazaqstandyq sportshy munymen toqtamai, US Open týrniriniń chempiony atandy. Finalda ol Arina Sobolenkodan 6:4, 5:7, 6:2 esebimen basym tústi.
Bul — Rybakinanyń US Open-degi alǵashqy, al «Úlken dýlyǵa» týrnirlerindegi úshinshi chempiondyǵy. 27 jastaǵy tennisshi WTA tarihynda álemdik reitingte birinshi orynǵa kóterilgen 30-shy sportshy boldy.
Sonymen qatar Elena Rybakina erler men áielder arasyndaǵy jekelei synda álemdik reitingti basqarǵan Qazaqstannyń alǵashqy ókili atandy.
