Qazirgi kezde tutynýshylardyń talǵamy tez ózgerdi. Al ýaqyttyń talabyna sai beiimdele almaǵan saýdagerler artta qalady. Adamnyń jaqsy dúniege tez úirenetini anyq. Internet-dúkenniń rahatyn kórgen jurt ǵalamtordaǵy ár saýda ornynan tap osyndai dárejede qyzmet kórsetýin kútedi. Halyqtyń qajettiligin aqtaý úshin satýshylardyń jalǵyz amaly bar. Ol – kásibine úzdiksiz innovatsiia men jańashyldyqtar endirý. Jańa 3D-tehnologiialary – internettegi saýdany túbegeili ózgertip, revoliýtsiia jasaýǵa qaýqarly kúsh.
Taýarlardy 3D keskindeý
Internettegi jumys qolailyǵy men kádimgi dúkenderden góri aýqymdy assortimentine qaramastan, elektrondy saýdanyń da óz kemshilikteri bar. Máselen, taýardy satyp almas buryn kádimgi dúkendegidei jan-jaqty qaraýǵa múmkindik joq. Dálirek aitsaq, osy kezge deiin bolǵan joq. Endi 3D-keskindeý arqasynda satýshy tutynýshylaryna taýarlarynyń interaktivti kólemdi keskinin usyna alady. Satyp alar aldynda, ony muqiiat zerttei alady. Keskinin úlkeitip, kishireitedi, qalaǵan jaǵyna buryp, bar qyrynan kóredi. Keibir satýshylar internettegi saýdasynyń sapasyn kóterý amaly retinde taýarlaryn kórsetetin beinerolikterdi paidalanyp otyr. Alaida jaqynda júrgizilgen saýalnamaǵa qaraǵanda, jurttyń 95 paiyzy odan góri interaktivti úsh ólshemdi keskinge kóńili aýǵan.
Taýarlardyń 3D keskindeýi tutynýshylarǵa olardyń sapasyn tekserýge múmkindik berip, satylymdar kórsetkishine de tikelei áser etti. Muny konversiia deńgeiinde, iaǵni saitqa kirgenderdiń jalpy sanynda naqty bir qimyl jasaǵandardyń úlesinen aiqyn baiqaýǵa bolady.
Shyǵys Eýropadaǵy sán-saltanat zattaryn satatyn eń iri ámbebap dúkenderdiń biri – TsÝM 40 myńnan asa taýar túrin 3D keskinge tsifrlandyrǵan. Bul qysqa merzimde zor mólsherde ónimderdi keskindeýge bolatynyn aiǵaqtap otyr. Eń bastysy, bul úshin durys quralyńyz bolýy kerek, óitkeni 3D ólshemdi keskindeýge qoldanylatyn amaldardyń kóbinde eleýli kemshilikter bar. Olar qymbat qural-jabdyqty qajet etedi jáne kóp ýaqyt alady. Al bul úlken katalogtar jasaý úshin jaramaidy. Tek jaqynda ǵana kez kelgen deneniń úsh ólshemdi keskinin jasaý ońailandy. Endi bul úsh satydan turatyn jeńil jumysqa ainala bastady. Tańdaǵan nysanyńyzdy tsifrli kameraǵa túsiresiz, osydan keiin ony óńdeitin platformaǵa júkteisiz. 3D keskini daiyn bolysymen veb-sait, uialy qosymsha nemese 3D / AR / VR qosymshalaryna ne qalaǵan jerińizge ornata alasyz. Qoldanýdaǵy tiimdiligimen qatar, úsh ólshemdi keskindeýge arnalǵan jańa SaaS tehnologiiasy óte jyldam. Ol burynǵylarmen salystyrǵanda 10 ese shapshań jáne arnaiy qural-jabdyqty qajet etpeidi.
3D-keskindeýdi qoldanýdyń úlgileri
Satýshylar úshin taýardy tsifrlandyrýda kezdesetin taǵy da bir qiyndyq boldy. Sońǵy ýaqytqa deiin jibek, bylǵary men zergerlik buiymdar sekildi qara tústi nemese jyltyr, móldir zattardy jáne pishini men faktýrasy erekshelenetin taýarlardy úsh ólshemde modeldeý jáne úsh ólshemde skanerleý múmkin emes edi. Degenmen, 3D-keskindeýdiń arqasynda bul sipattary da kedergi bolýdan qaldy.
Kólemi úlken buiymdardy satatyn internet-dúkender óniminiń mólsheri men túri jáne qai materialdan jasalǵanyn aiqyn kórsetý úshin úsh ólshemdi keskindeý quralyn qoldanady. Mysaly, jol sandyqtaryn satatyn «Samsonite» qurylǵy arqasynda taýarlarynyń onlain-tanystyrylymdaryn barynsha shynaiy jasaǵan.
«Tutynýshylarymyzǵa taýarlardy muqiiat zertteý múmkindigi mańyzdy, al 3D-keskindeý onlain-saýda men kádimgi dúkender arasynda alshaqtyqty eńserýge múmkindik beredi», – deidi «Samsonite» kompaniiasynyń elektrondy saýda boiynsha vitse-prezidenti Djei Nigrelli.
Odan kishi ári názik buiymdardy da 3D túrinde tsifrlandyrýǵa bolady. Buǵan mysal retinde elektrondy quttyqtaýlar salasynda kósh bastap júrgen «American Greetings» kompaniiasyn keltirýge bolady. Olar óz saitynda joǵary sapaly fotografiialarmen qosa 3D-keskinderdi de usynyp otyr.
Keń qoldanylyp júrgen quraldarmen quttyqtaý hattarynyń túrin internette dál keltirý múmkin emes, sol sebepten «American Greetings» ónimderin 3D túrde keskindep, óz kúrdeli máselesin sheshti deýge bolady. Ádette quttyqtaý hattarynda jyltyraq, bederli jáne ózge de áshekeiler bolady. Al ónimge sán keltiretin bul dúnieniń bárin dástúrli 2D- túrindegi fotosýrette baǵalaý qiyn.
Ish kiimdi de 3D túrinde tsifrlandyrýǵa bolady, muny «F3 Studio» eýropalyq sán brendi dáleldegen. Ásem árleýi men shilter bezekteri 3D-keskindeý tehnologiiasy úshin qiyndyq týǵyzbaidy.
Keibir zergerlik brendter de zamannan artta qalǵysy kelmeidi. «Guérin Joaillerie» eýropadaǵy premiým-brend asyl tastarynyń jarqyraýy men móldirligin, sáýle shashýyn jáne erekshe dizainyn aiqyn kórsetý úshin 3D-keskindeýdi qoldanǵan. Árine, asyl tastardyń mundai qasietterin ózge tásildermen jetkizý qiyn.
Zergerlik buiymdar saýdasy airyqsha kásip. Tutynýshylardyń kóbisi onlain túrde asyl tastardy satyp alýǵa kúmánmen qaraidy. Al endi tek saýsaq ushymen jádigerdiń búkil qyryn qaraýǵa múmkindik beretin interaktivti keskindeý osy kúdikterdi seiilte alady.
Ónimderdi 3D-keskindeý salasyna arnalǵan jasandy intellekt quraldary
Biznes-sheshimderdi qabyldaý isi derekqorlarǵa kóbirek súiene bastaǵandyqtan, ólsheýish kórsetkishterine suranys kúrt artqan. Búkil saladaǵy marketologtar konversiia koeffitsienti, veb-saitqa kirgender sany jáne tutynýshylarmen ózara árekettesý deńgeiin mańyzdy baǵdarlar retinde qarastyrady. Biraq keibireýi jańa kórsetkishterdi jumysynda qoldaný qajettigin áli de sezbei júrgendei.
2019 jyly shyqqan jasandy intellekt quraldary tutynýshylar veb-saittardaǵy taýar keskinderimen qandai qimyldar jasaitynyn qadaǵalap, eń baiandy kórsetkishterin jylý kartasyna túsire alady.
Qai qyrynan qansha ýaqyt qaraǵanyn jáne qai tustary eń kóp qyzýǵyshylyq týǵyzǵanyn belgileidi, sondai-aq tutynýshylardyń qylyǵyna qarap, satylý múmkindigin boljap beredi.
