Elimizde «Elektrondy qujattardyń biryńǵai muraǵaty» aqparattyq júiesi qurylady. Bul jaiynda Senat depýtattarynyń resmi saýalyna QR Premer-Ministri Asqar Maminniń jaýabynda aitylǵan, dep habarlaidy QazAqparat.
«Tsifrlyq Qazaqstan» memlekettik baǵdarlamasy aiasynda «Elektrondy qujattardyń biryńǵai muraǵaty» aqparattyq júiesin qurý jumystary júrgizilip jatyr. Aqparattyq júieni iske qosý memlekettik muraǵattardyń jumysyn tolyqtai avtomattandyrýǵa jáne QR Ulttyq muraǵat qory elektrondy qujattaryn uzaq merzimdi saqtaýdy qamtamasyz etýge múmkindik beredi. «Muraǵat-2025» jobasyn iske asyrý jónindegi is-sharalardyń keshendi josparyn júzege asyrýdy bastaý 2020 jylǵa kózdelgen edi. Alaida, sanitarlyq-epidemiologiialyq sharalardyń júzege asyrylýyna bailanysty shyǵystardyń artýyna orai ony respýblikalyq deńgeide qarjylandyrý keiinge qaldyryldy», - dedi Premer-Ministr.
Úkimet basshysynyń aitýynsha, atalǵan keshendi jospar óńirlik deńgeide Aqtóbe, Almaty, Jambyl, Qaraǵandy, Qostanai, Pavlodar oblystarynda júzege asyrylyp jatyr. Onyń ishinde skanerler, kompiýterler, serverler, konditsionerler satyp alyndy. Jinaqtar basylyp shyǵaryldy. Muraǵatqa arnalǵan úi-jailar jóndeýden ótkizilip, ǵimarattar satyp alyndy.
«Almaty, Aqmola, Jambyl, Qyzylorda, Mańǵystaý jáne Pavodar oblystarynyń jergilikti atqarýshy organdary keshendi jospardyń 2021 jylǵa arnalǵan sharalaryna biýdjettik ótinimder ázirlep otyr», - dedi Asqar Mamin.
